സീറോ-ലെറ്റൻസി ഓഡിയോയും ആർട്ടിഫിഷ്യൽ ഇന്റലിജൻസും സമന്വയിപ്പിച്ചുകൊണ്ട് ഓഡിയോ രംഗത്ത് വിപ്ലവം സൃഷ്ടിക്കാൻ ഒരുങ്ങുകയാണ് ക്വാൽകോമും (Qualcomm) പ്രമുഖ ഇന്ത്യൻ വെയറബിൾ ബ്രാൻഡായ ബോട്ട് (boAt) ഉം. അടുത്തിടെ ന്യൂഡൽഹിയിൽ നടന്ന ‘സ്നാപ്ഡ്രാഗൺ ഫോർ ഇന്ത്യ’ (Snapdragon For India) ഇവന്റിലാണ് പുതിയ സാങ്കേതിക വിദ്യകൾ അവതരിപ്പിക്കപ്പെട്ടത്.
ഈ കൂട്ടുകെട്ടിൽ പുറത്തിറങ്ങുന്ന ഏറ്റവും പുതിയ ഹെഡ്ഫോണായ boAt Nirvana Eutopia 2 Pro, ഓഡിയോ സാങ്കേതികവിദ്യയിലെ പുതിയ മാറ്റങ്ങളുടെ നേർക്കാഴ്ചയാകുന്നു.
ഹെഡ്ഫോണുകൾ ഇനി വെറും ശബ്ദ ഉപകരണങ്ങളല്ല
നമ്മുടെ ലാപ്ടോപ്പുകളിലും ഫോണുകളിലും ഉള്ളതുപോലെ കരുത്തുറ്റ ചിപ്പുകൾ ഇനി ഹെഡ്ഫോണുകളെയും നിയന്ത്രിക്കും. സ്നാപ്ഡ്രാഗൺ S3 Gen 1 പ്ലാറ്റ്ഫോമിലാണ് പുതിയ ബോട്ട് ഹെഡ്ഫോണുകൾ പ്രവർത്തിക്കുന്നത്. വെറും പാട്ടു കേൾക്കാനുള്ള ഉപകരണം എന്നതിലുപരി, വോയ്സ് കമാൻഡുകൾ വഴി നിയന്ത്രിക്കാവുന്ന ഒരു കുഞ്ഞൻ കമ്പ്യൂട്ടറായി ഹെഡ്ഫോണുകൾ മാറിക്കഴിഞ്ഞു എന്ന് ക്വാൽകോം സീനിയർ വൈസ് പ്രസിഡന്റ് ഡിനോ ബെക്കിസ് പറയുന്നു.
സ്നാപ്ഡ്രാഗൺ സൗണ്ട്: വ്യക്തതയുടെ പുതിയ തലം
വയർലെസ് ഹെഡ്ഫോണുകളിൽ ബ്ലൂടൂത്ത് വഴി ഒട്ടും ഗുണമേന്മ കുറയാത്ത ‘ലോസ്ലെസ്സ് ഓഡിയോ’ (Lossless Audio) ലഭ്യമാക്കുക എന്നതാണ് സ്നാപ്ഡ്രാഗൺ സൗണ്ട് സാങ്കേതികവിദ്യയുടെ പ്രധാന ലക്ഷ്യം. കൂടാതെ:
സ്പേഷ്യൽ ഓഡിയോ (Spatial Audio): തലയുടെ ചലനത്തിനനുസരിച്ച് ശബ്ദം മാറുന്ന അനുഭവം.
ഓറകാസ്റ്റ് (Auracast): ഒരു ഉറവിടത്തിൽ നിന്ന് ഒന്നിലധികം ഹെഡ്ഫോണുകളിലേക്ക് ഒരേസമയം ഓഡിയോ സ്ട്രീം ചെയ്യാനുള്ള കഴിവ്.
ഇന്ത്യൻ സാഹചര്യങ്ങൾക്കനുസരിച്ചുള്ള മാറ്റങ്ങൾ
ഇന്ത്യയിലെ തിരക്കേറിയ തെരുവുകളിലെയും ഗതാഗതക്കുരുക്കിലെയും വലിയ ശബ്ദങ്ങൾക്കിടയിലും മികച്ച ‘ആക്റ്റീവ് നോയിസ് ക്യാൻസലേഷൻ’ (ANC) നൽകുക എന്നത് വലിയ വെല്ലുവിളിയാണെന്ന് ബോട്ട് ചീഫ് പ്രൊഡക്റ്റ് ഓഫീസർ ശ്യാം വേദാന്തം ചൂണ്ടിക്കാട്ടി. ഇന്ത്യൻ വീടുകളിലെയും നിരത്തുകളിലെയും ശബ്ദ സാഹചര്യങ്ങൾ പഠിച്ചാണ് പുതിയ ഹെഡ്ഫോണുകൾ ട്യൂൺ ചെയ്തിരിക്കുന്നത്. ഇതിനായി സംഗീതജ്ഞരുടെയും വിദഗ്ധരുടെയും സഹായം തേടിയിട്ടുണ്ട്.
എഐയും ബാറ്ററി കരുത്തും
പുതിയ ഹെഡ്ഫോണുകളിലെ നോയിസ് ക്യാൻസലേഷൻ സംവിധാനം പൂർണ്ണമായും മെഷീൻ ലേണിംഗ് അൽഗോരിതങ്ങളെ അടിസ്ഥാനമാക്കിയുള്ളതാണ്. ഹെഡ്ഫോണിലെ പ്രോസസറിലുള്ള എൻപിയു (NPU – Neural Processing Unit) ഈ അൽഗോരിതങ്ങളെ വളരെ കുറഞ്ഞ വൈദ്യുതി ഉപയോഗത്തിൽ പ്രവർത്തിപ്പിക്കാൻ സഹായിക്കുന്നു, ഇത് മികച്ച ബാറ്ററി ലൈഫ് ഉറപ്പാക്കുന്നു.
ഗെയിമിംഗ് രംഗത്ത് വയർലെസ് ഹെഡ്ഫോണുകൾ നേരിടുന്ന പ്രധാന പ്രശ്നമായ ലാഗ് (Latency) പരിഹരിക്കാനുള്ള സാങ്കേതിക വിദ്യകളും ക്വാൽകോം വികസിപ്പിക്കുന്നുണ്ട്. സാധാരണ വയർഡ് ഹെഡ്ഫോണുകൾക്ക് സമാനമായ വേഗതയും വ്യക്തതയും നൽകുന്ന പ്രീമിയം അനുഭവം ഇനി ഉപഭോക്താക്കൾക്ക് പ്രതീക്ഷിക്കാം.
About The Author
