ഇന്റർനെറ്റിൽ നമ്മുടെ സ്വകാര്യത എത്രത്തോളം സുരക്ഷിതമാണ്? എപ്പോഴെങ്കിലും നിങ്ങളുടെ പേരോ ഫോൺ നമ്പറോ ഗൂഗിളിൽ തിരഞ്ഞു നോക്കിയിട്ടുണ്ടോ? പലപ്പോഴും നമ്മൾ പോലും അറിയാതെ നമ്മുടെ വീട്ടുപേരും ഇമെയിൽ വിലാസവും ഫോൺ നമ്പറുമെല്ലാം പല വെബ്സൈറ്റുകളിലും പരസ്യമായി കിടക്കുന്നുണ്ടാകും. ഇത്തരം വ്യക്തിഗത വിവരങ്ങൾ ആരുടെയെങ്കിലും കൈകളിൽ എത്തിപ്പെട്ടാൽ ഉണ്ടാകാവുന്ന സുരക്ഷാ ഭീഷണികൾ ചെറുതല്ല. എന്നാൽ ഇനി സൈബർ ലോകത്തെ ഈ തലവേദനയ്ക്ക് പരിഹാരവുമായി എത്തിയിരിക്കുകയാണ് സെർച്ച് എഞ്ചിൻ ഭീമനായ ഗൂഗിൾ. നമ്മുടെ അനുവാദമില്ലാതെ ഇന്റർനെറ്റിൽ പ്രചരിക്കുന്ന വ്യക്തിഗത വിവരങ്ങൾ കണ്ടെത്തി അവ ഗൂഗിൾ സെർച്ചിൽ നിന്ന് എന്നെന്നേക്കുമായി തുടച്ചുമാറ്റാൻ ഉപയോക്താക്കൾക്ക് തന്നെ അധികാരം നൽകുന്ന വിപ്ലവകരമായ സുരക്ഷാ ഫീച്ചറാണ് ഗൂഗിൾ സജ്ജമാക്കിയിരിക്കുന്നത്.
“റിസൾട്ട്സ് എബൗട്ട് യു” (Results about you) എന്ന് പേരിട്ടിരിക്കുന്ന ഈ പുതിയ ഡാഷ്ബോർഡ് സംവിധാനം ഓരോ ഉപയോക്താവിനും സ്വന്തം ഡിജിറ്റൽ വിവരങ്ങൾക്ക് മേൽ പൂർണ്ണ നിയന്ത്രണം നൽകുന്നു. നിങ്ങളുടെ മൊബൈലിലെ ഗൂഗിൾ ആപ്പ് തുറന്ന് പ്രൊഫൈൽ ചിത്രത്തിൽ ക്ലിക്ക് ചെയ്താൽ ഈ സുരക്ഷാ ഡാഷ്ബോർഡിലേക്ക് പ്രവേശിക്കാം. ഇവിടെ നിങ്ങളുടെ പേര്, വിളിപ്പേരുകൾ, നിലവിലുള്ളതോ പഴയതോ ആയ വീട്ടു വിലാസങ്ങൾ, ഫോൺ നമ്പറുകൾ എന്നിവ രേഖപ്പെടുത്തി വെക്കാവുന്നതാണ്. ഈ വിവരങ്ങൾ അടങ്ങിയ ഏതെങ്കിലും ലിങ്കുകൾ ഗൂഗിൾ സെർച്ചിൽ പ്രത്യക്ഷപ്പെടുകയാണെങ്കിൽ, ഒരു കംപ്യൂട്ടർ സുരക്ഷാ ഗാർഡിനെപ്പോലെ ഗൂഗിൾ നിങ്ങളെ ഇമെയിൽ വഴിയോ ആപ്പ് നോട്ടിഫിക്കേഷൻ വഴിയോ ഉടനടി വിവരമറിയിക്കും. ഇങ്ങനെ കണ്ടെത്തുന്ന ലിങ്കുകൾ പരിശോധിച്ച്, അവ സെർച്ച് റിസൾട്ടിൽ നിന്ന് ഒഴിവാക്കാൻ വെറും ഒറ്റ ക്ലിക്കിലൂടെ നിങ്ങൾക്ക് ഗൂഗിളിനോട് ആവശ്യപ്പെടാം. നിലവിൽ 18 വയസ്സിന് മുകളിലുള്ളവർക്കാണ് ഈ ഫീച്ചർ ലഭ്യമാകുക. കുട്ടികളുടെ സുരക്ഷ മുൻനിർത്തി പ്രായപൂർത്തിയാകാത്തവരുടെ വിവരങ്ങൾ മാറ്റാൻ പ്രത്യേക റിക്വസ്റ്റ് ഫോമും ഗൂഗിൾ ഒരുക്കിയിട്ടുണ്ട്.
ഇനി ഇതൊന്നുമല്ലാതെ സാധാരണ രീതിയിൽ ഗൂഗിളിൽ തിരയുമ്പോഴാണ് നിങ്ങളുടെ ഫോൺ നമ്പറോ മറ്റോ അടങ്ങിയ ഒരു വെബ്സൈറ്റ് ശ്രദ്ധയിൽ പെടുന്നതെങ്കിൽ, അവിടെ വെച്ചുതന്നെ അതിന് പൂട്ടിടാനും സാധിക്കും. സെർച്ച് ലിങ്കിന് തൊട്ടടുത്തുള്ള മൂന്ന് കുത്തുകളിൽ ക്ലിക്ക് ചെയ്ത് ‘റിമൂവ് റിസൾട്ട്’ എന്ന ഓപ്ഷൻ തിരഞ്ഞെടുത്താൽ മിനിറ്റുകൾക്കകം റിപ്പോർട്ട് സമർപ്പിക്കാം. നമ്മൾ നൽകുന്ന അപേക്ഷകളുടെ നിലവിലെ അവസ്ഥ എന്തായെന്ന് ഈ ഡാഷ്ബോർഡിലൂടെ തത്സമയം നിരീക്ഷിക്കാനും ഗൂഗിൾ സൗകര്യമൊരുക്കുന്നുണ്ട്.
അതേസമയം, ഈ ഫീച്ചർ ദുരുപയോഗം ചെയ്യാതിരിക്കാൻ കൃത്യമായ ചില മാനദണ്ഡങ്ങളും ഗൂഗിൾ മുന്നോട്ട് വെക്കുന്നുണ്ട്. പൊതുജനങ്ങൾക്ക് ഉപകാരപ്രദമായ വിവരങ്ങൾ സെർച്ചിൽ നിന്ന് നീക്കം ചെയ്യില്ല എന്നതാണ് ഇതിൽ പ്രധാനം. അതായത്, സർക്കാർ വെബ്സൈറ്റുകൾ, പ്രമുഖ മാധ്യമങ്ങളിലെ വാർത്തകൾ, വിദ്യാഭ്യാസ സ്ഥാപനങ്ങളുടെ വിവരങ്ങൾ എന്നിവ ഗൂഗിൾ സെർച്ചിൽ നിന്ന് അപ്രത്യക്ഷമാകില്ല. കൂടാതെ, ഫേസ്ബുക്ക് പോലെയുള്ള സോഷ്യൽ മീഡിയകളിൽ നമ്മൾ തന്നെ പോസ്റ്റ് ചെയ്ത വിവരങ്ങൾ നമുക്ക് തന്നെ ഡിലീറ്റ് ചെയ്യാവുന്നതുകൊണ്ട് അത്തരം ലിങ്കുകളിലും ഗൂഗിൾ ഇടപെടില്ല. ഏറ്റവും പ്രധാനമായി ഉപയോക്താക്കൾ ഓർക്കേണ്ടത്, ഈ സംവിധാനത്തിലൂടെ ഗൂഗിൾ സെർച്ച് ഫലങ്ങളിൽ നിന്ന് മാത്രമേ നിങ്ങളുടെ വിവരങ്ങൾ മറയ്ക്കാനാകൂ എന്നതാണ്. ആ വിവരങ്ങൾ അടങ്ങിയിരിക്കുന്ന യഥാർത്ഥ വെബ്സൈറ്റിൽ നിന്ന് അത് പൂർണ്ണമായി ഇല്ലാതാക്കാൻ ആ സൈറ്റിന്റെ ഉടമസ്ഥരുമായി തന്നെ നേരിട്ട് ബന്ധപ്പെടേണ്ടതുണ്ട്. എങ്കിലും, സൈബർ തട്ടിപ്പുകാർക്കും ഡാറ്റാ ചോർച്ചയ്ക്കും എതിരെ സാധാരണക്കാരായ ഇന്റർനെറ്റ് ഉപയോക്താക്കൾക്ക് പ്രയോഗിക്കാനാകുന്ന ഏറ്റവും ശക്തമായ ഒരു ആയുധമായി മാറുകയാണ് ഗൂഗിളിന്റെ ഈ പുതിയ കാവൽക്കാരൻ.
About The Author
