പത്ത് വർഷത്തോളമായി ആൻഡ്രോയിഡ് ഉപഭോക്താക്കളുടെ വിശ്വസ്ത സഹായിയായിരുന്ന ‘ഗൂഗിൾ അസിസ്റ്റന്റ്’ ചരിത്രമാകാൻ ഒരുങ്ങുന്നു. ആധുനിക ആർട്ടിഫിഷ്യൽ ഇന്റ്ലിജൻസ് സാങ്കേതികവിദ്യയായ ജെമിനിയെ പൂർണ്ണമായും അസിസ്റ്റന്റിന് പകരമായി അവതരിപ്പിക്കാനാണ് ഗൂഗിളിന്റെ തീരുമാനം. 2025 അവസാനത്തോടെ ഈ മാറ്റം പൂർത്തിയാക്കാനായിരുന്നു നേരത്തെ തീരുമാനിച്ചിരുന്നതെങ്കിലും, ഉപഭോക്താക്കൾക്ക് തടസ്സമില്ലാത്ത അനുഭവം ഉറപ്പാക്കുന്നതിനായി ഈ സമയപരിധി 2026-ലേക്ക് നീട്ടിയിരിക്കുകയാണ്.
ആൻഡ്രോയിഡ് ഫോണുകൾ, ടാബ്ലെറ്റുകൾ എന്നിവയ്ക്ക് പുറമെ ഐഒഎസ് പ്ലാറ്റ്ഫോമിലെ സ്റ്റാൻഡലോൺ അസിസ്റ്റന്റ് ആപ്പും ഇതോടെ നിർത്തലാക്കും. അവധിദിനങ്ങളിൽ ഉപഭോക്താക്കൾക്കുണ്ടാകാൻ സാധ്യതയുള്ള ബുദ്ധിമുട്ടുകൾ ഒഴിവാക്കാനും, അസിസ്റ്റന്റില് ലഭ്യമായിരുന്ന എല്ലാ സേവനങ്ങളും ജെമിനിയിലും കൃത്യമായി ലഭ്യമാണെന്ന് ഉറപ്പുവരുത്താനുമാണ് ഗൂഗിൾ ഇപ്പോൾ സമയം നീട്ടി ചോദിച്ചിരിക്കുന്നത്. ഘട്ടം ഘട്ടമായി വിവിധ രാജ്യങ്ങളിൽ ഈ മാറ്റം നടപ്പിലാക്കാനാണ് കമ്പനി ലക്ഷ്യമിടുന്നത്.
സാധാരണ വോയ്സ് അസിസ്റ്റന്റുകളിൽ നിന്ന് വ്യത്യസ്തമായി, മനുഷ്യരുമായി സംസാരിക്കുന്നതുപോലെ സ്വാഭാവികമായ സംഭാഷണങ്ങൾ നടത്താനും ചിത്രങ്ങളും വീഡിയോകളും വിശകലനം ചെയ്യാനും ജെമിനിക്ക് സാധിക്കും. വെയർ ഒഎസ് (Wear OS), ഗൂഗിൾ ടിവി, ആൻഡ്രോയിഡ് ഓട്ടോ എന്നിവയിൽ ഇതിനകം തന്നെ ജെമിനി ലഭ്യമായി തുടങ്ങിയിട്ടുണ്ട്. കൂടാതെ, നോട്ട്ബുക്ക് എൽഎം സപ്പോർട്ട്, എഐ വീഡിയോ ഡിറ്റക്ഷൻ, സെമാന്റിക് സെർച്ച് തുടങ്ങിയ നൂതന ഫീച്ചറുകൾ ജെമിനിയെ കൂടുതൽ കരുത്തുറ്റതാക്കുന്നു.
2016-ൽ പുറത്തിറങ്ങിയ ഗൂഗിൾ അസിസ്റ്റന്റ് പത്താം വർഷത്തിലേക്ക് കടക്കുമ്പോഴാണ് ഈ മാറ്റം സംഭവിക്കുന്നത് എന്നത് ശ്രദ്ധേയമാണ്. കേവലം ചോദ്യങ്ങൾക്ക് ഉത്തരം നൽകുന്നതിൽ ഉപരിയായി, ദൈനംദിന ജീവിതത്തിലെ കാര്യങ്ങൾ കൃത്യമായി പ്ലാൻ ചെയ്യാനും വിവരങ്ങൾ കൂടുതൽ ആഴത്തിൽ വിശകലനം ചെയ്യാനും സഹായിക്കുന്ന ഒരു ജനറേറ്റീവ് എഐ സഹായിയെയാണ് ഗൂഗിൾ ലക്ഷ്യമിടുന്നത്. ആദ്യകാല ഉപഭോക്താക്കൾക്ക് അസിസ്റ്റന്റിന്റെ ശൈലിയിൽ നിന്ന് മാറുന്നത് ചെറിയ ബുദ്ധിമുട്ട് ഉണ്ടാക്കിയേക്കാമെങ്കിലും, കൂടുതൽ സ്മാർട്ടായതും വേഗതയേറിയതുമായ സേവനങ്ങൾ ജെമിനി വാഗ്ദാനം ചെയ്യുന്നു.
About The Author
