സർക്കാർ ആശയവിനിമയത്തെ കൂടുതൽ സുരക്ഷിതവും സ്വതന്ത്രവുമായതാക്കാനുള്ള നീക്കങ്ങളുടെ ഭാഗമായി, ഇന്ത്യൻ സർക്കാർ വികസിപ്പിച്ച ‘സന്ദേശ്’ (Sandes) ഇൻസ്റ്റന്റ് മെസേജിംഗ് ആപ്പ് പൊതുജനങ്ങൾക്കും ഇനി ഉപയോഗിക്കാം. നാഷണൽ ഇൻഫർമാറ്റിക്സ് സെന്റര് (NIC) വികസിപ്പിച്ച ഈ ആപ്പ് ഇപ്പോൾ ആൻഡ്രോയിഡ്, iOS, വെബ് ബ്രൗസർ എന്നിവയിൽ ഉപയോഗിക്കാം.
സർക്കാരിന്റെ ഉടമസ്ഥതയിലുള്ള ഈ ആപ്പ് പൂർണമായും സർക്കാർ നിയന്ത്രിത ഡാറ്റാ സെന്ററുകളിലാണ് ഹോസ്റ്റ് ചെയ്തിരിക്കുന്നത്, അതായത് ഉപയോക്താക്കളുടെ സന്ദേശങ്ങളും ഡാറ്റയും ഇന്ത്യയുടെ അതിർത്തിക്കുള്ളിലായിരിക്കും സൂക്ഷിക്കുന്നത്. വിദേശ ആപ്പുകളിലൂടെ ഉണ്ടാകാവുന്ന ഡാറ്റാ പ്രൈവസി ആശങ്കകൾക്കും സുരക്ഷാ ഭീഷണികൾക്കും ഒരു രാജ്യാന്തര പരിഹാരമാണ് സന്ദേശ്.
2019-ൽ മേക് ഇൻ ഇന്ത്യ (Make in India) പദ്ധതിയുടെ ഭാഗമായാണ് ഗവൺമെന്റ് ഇൻസ്റ്റന്റ് മെസേജിംഗ് സിസ്റ്റം (GIMS) രൂപംകൊണ്ടത്. സർക്കാർ ഉദ്യോഗസ്ഥർ തമ്മിലുള്ള സുരക്ഷിത ആശയവിനിമയത്തിനായി പ്രത്യേകം വികസിപ്പിച്ച ഈ സംവിധാനത്തെ ഏകദേശം 6,600 സർക്കാർ ഉദ്യോഗസ്ഥർ പരീക്ഷിച്ചു.
2021 ഫെബ്രുവരിയിൽ, ഈ പ്ലാറ്റ്ഫോം പൊതുജനങ്ങൾക്കും ലഭ്യമാക്കുന്നതിനായി ‘സന്ദേശ്’ (Sandes) എന്ന പേരിൽ പുതുക്കി പുറത്തിറക്കി. ആദ്യഘട്ടത്തിൽ പരിമിതമായ ആക്സസോടെ ലഭ്യമായിരുന്ന സേവനം പിന്നീട് മുഴുവൻ സവിശേഷതകളോടും ലഭ്യമായി.
ജി20 ഉച്ചകോടി (2023) സമയത്ത് ഡൽഹി പോലീസ് ഈ ആപ്പ് ആണ് രഹസ്യ സ്വഭാവമുള്ള സന്ദേശങ്ങൾ കൈമാറാൻ ഉപയോഗിച്ചത്. തുടർന്ന്, 2024 ജനുവരിയിൽ ഇന്ത്യൻ അർധസൈനികസേനകൾ (paramilitary forces) ഔദ്യോഗിക ആശയവിനിമയത്തിനായി വാട്ട്സ്ആപ്പിന് പകരം സന്ദേശ് സ്വീകരിച്ചു. മഹാരാഷ്ട്ര സർക്കാർ, 2024 ജൂലൈ മുതൽ, സംസ്ഥാനത്തെ എല്ലാ ഔദ്യോഗിക വകുപ്പുകൾക്കും സന്ദേശ് ആപ്പ് നിർബന്ധമാക്കി, സൈബർ സുരക്ഷയും ഡാറ്റാ നിയന്ത്രണവും ഉറപ്പാക്കുക എന്നതായിരുന്നു ലക്ഷ്യം.
സന്ദേശിന്റെ സേവനങ്ങൾ
സന്ദേശ് ആപ്പിന്റെ മുഖ്യ സവിശേഷതയാണ് എൻഡ്-ടു-എൻഡ് എൻക്രിപ്ഷൻ, അതായത് സന്ദേശം അയക്കുന്നയാളും സ്വീകരിക്കുന്നയാളും മാത്രമേ അതിന്റെ ഉള്ളടക്കം കാണാൻ കഴിയൂ.
ആപ്പിൽ ലഭ്യമായ പ്രധാന ഫീച്ചറുകൾ
പേർസണൽ ചാറ്റ് , ഗ്രൂപ്പ് ചാറ്റ്, വോയ്സ് & വീഡിയോ കോളുകൾ
മെസേജ് ടാഗിങ്: സന്ദേശങ്ങളെ Confidential, Priority, Auto Delete (വായിച്ചാൽ സ്വയം മായുന്ന) ആയി തരം തിരിക്കാം.
ഡിജിലോക്കർ, NIC ഇമെയിൽ, ഇ-ഓഫീസ് തുടങ്ങിയ സർക്കാർ സംവിധാനങ്ങളുമായി ബന്ധിപ്പിച്ചിരിക്കുന്നു.
ഫയൽ ഷെയറിംഗ്: ഡോക്യുമെന്റുകൾ, ചിത്രങ്ങൾ, ഓഡിയോ, വീഡിയോ ഫയലുകൾ (പരമാവധി 15 എംബി) പങ്കിടാനുള്ള സൗകര്യം
ചാറ്റ് ബാക്കപ്പ്, ഫോർവേഡ്, ബ്രോഡ്കാസ്റ്റ്, ടെക്സ്റ്റ് കസ്റ്റമൈസേഷൻ തുടങ്ങി നിരവധി സവിശേഷതകൾ
നിയന്ത്രണങ്ങള്
സന്ദേശിൽ സാധുവായ മൊബൈൽ നമ്പർ ഉപയോഗിച്ച് മാത്രമേ രജിസ്ട്രേഷൻ സാധ്യമാകൂ. പൊതുപയോക്താക്കള്ക്ക് ഇപ്പോൾ പേർസണൽ ചാറ്റ് മാത്രമാണ് ലഭ്യമായിട്ടുള്ളത്.
ഔദ്യോഗിക ഗ്രൂപ്പുകൾക്ക് പരമാവധി 200 അംഗങ്ങളെയും , സാധാരണ ഗ്രൂപ്പുകൾക്ക് 50 അംഗങ്ങളെയും വരെ മാത്രമേ ഉൾപ്പെടുത്താനാകൂ.
ബ്രോഡ്കാസ്റ്റ് ലിസ്റ്റിൽ 10 കോൺടാക്റ്റുകൾ വരെയാണ് ഉയർന്ന പരിമിതി.
ഫയൽ ഷെയറിംഗിന് 15 എംബി വലുപ്പം കവിയാത്ത ഡോക്യുമെന്റുകൾ, ചിത്രങ്ങൾ, ഓഡിയോ, വീഡിയോ ഫയലുകൾ മാത്രമേ അയക്കാനാകൂ.
സന്ദേശ് ആപ്പ് എന്തിന്
സന്ദേശ് ആപ്പിന്റെ വികസനം സർക്കാർ ഡിജിറ്റൽ ആത്മനിർഭരതയുടെയും ദേശീയ സുരക്ഷയുടെയും ഭാഗമായുള്ള വലിയ നീക്കമായി കണക്കാക്കപ്പെടുന്നു. വിദേശ ആപ്പുകൾ നിയന്ത്രിക്കുന്ന സർവറുകളിൽ സൂക്ഷിക്കുന്ന സർക്കാർ ഡാറ്റാ സുരക്ഷിതമല്ലെന്ന ആശങ്കകൾ മറികടക്കാൻ, ആഭ്യന്തരമായി ഹോസ്റ്റ് ചെയ്യുന്ന സന്ദേശ് ഒരു മികച്ച പരിഹാരമാകുമെന്ന് അധികൃതർ വ്യക്തമാക്കി.
“സന്ദേശ് സർക്കാർ സ്ഥാപനങ്ങൾക്കിടയിലെ ആശയവിനിമയത്തെ സുരക്ഷിതവും ഏകീകൃതവുമാക്കും. അതേസമയം പൊതുജനങ്ങൾക്കും അതിന്റെ ആനുകൂല്യങ്ങൾ അനുഭവിക്കാനാകും,” എന്ന് ഐ.ടി. മന്ത്രാലയം വ്യക്തമാക്കി.
ഇന്ത്യയിൽ ഏറ്റവും കൂടുതൽ ഉപയോഗിക്കുന്ന വാട്ട്സ്ആപ്പ് പോലുള്ള ആപ്പുകൾ വിദേശ കമ്പനികളുടെ നിയന്ത്രണത്തിലാണെന്ന സാഹചര്യത്തിൽ, സന്ദേശ് സർക്കാർ, സുരക്ഷാ ഏജൻസികൾ, പൊതുസംരംഭങ്ങൾ എന്നിവയ്ക്കായി സ്വദേശീയവും സുരക്ഷിതവുമായ ഒരു ഡിജിറ്റൽ ആശയവിനിമയത്തിന് അവസരം ഒരുക്കുകയാണ്.
നിലവിൽ നിരവധി സംസ്ഥാനങ്ങൾ സന്ദേശ് ഉപയോഗം വ്യാപിപ്പിക്കാൻ പദ്ധതികൾ ആസൂത്രണം ചെയ്യുന്നതായും കേന്ദ്ര സർക്കാർ സ്രോതസുകൾ സൂചിപ്പിച്ചു.
സുരക്ഷിത ആശയവിനിമയവും ഡാറ്റാ സ്വാതന്ത്ര്യവും ലക്ഷ്യമാക്കി രൂപകൽപ്പന ചെയ്ത ‘സന്ദേശ്’, ഇന്ത്യയുടെ ഡിജിറ്റൽ സ്വയംപര്യാപ്തതയിലേക്കുള്ള ഒരു ഉറച്ച ചുവടുവെയ്പ്പായി മാറിക്കൊണ്ടിരിക്കുകയാണ്.
About The Author
