ഉപയോക്താക്കളുടെ നഷ്ടപ്പെട്ട ഇലക്ട്രോണിക് ഉപകരണങ്ങൾ കണ്ടെത്താൻ സഹായിക്കുന്ന ‘ഫൈൻഡ് മൈ ഡിവൈസ്’ (Find My Device) ശൃംഖലയിൽ നിർണ്ണായക പരിഷ്കാരങ്ങളുമായി ഗൂഗിൾ. സ്മാർട്ട്ഫോണുകൾക്കും ടാബ്ലെറ്റുകൾക്കും പുറമെ, ഇനി മുതൽ ലാപ്ടോപ്പുകളിലൂടെയും ഡെസ്ക്ടോപ്പ് ബ്രൗസറുകളിലൂടെയും ബ്ലൂടൂത്ത് ട്രാക്കറുകളും ഹെഡ്ഫോണുകളും കണ്ടെത്താനുള്ള സൗകര്യം ഗൂഗിൾ ഹബ്ബിൽ ലഭ്യമാക്കി. പിക്സൽ ബഡ്സ് പ്രോ 2 (Pixel Buds Pro 2) ഉൾപ്പെടെയുള്ള അനുയോജ്യമായ ഹെഡ്ഫോണുകളും വിവിധ കമ്പനികളുടെ ലൊക്കേഷൻ ടാഗുകളും ഇത്തരത്തിൽ ട്രാക്ക് ചെയ്യാൻ സാധിക്കും.
നേരത്തെ സ്മാർട്ട്ഫോണുകളിലെ ആപ്പ് വഴി മാത്രം ലഭ്യമായിരുന്ന പല ഫീച്ചറുകളും ഇപ്പോൾ വെബ് പതിപ്പിലും ഉൾപ്പെടുത്തിയിട്ടുണ്ട്. ലാപ്ടോപ്പിലിരുന്ന് തന്നെ നഷ്ടപ്പെട്ട ട്രാക്കറുകൾ റിംഗ് ചെയ്യിക്കാനും, ഉപകരണങ്ങൾ കാണാനില്ലെന്ന് (Mark as Lost) അടയാളപ്പെടുത്താനും, ആവശ്യമെങ്കിൽ അവയുടെ പേര് മാറ്റാനോ അക്കൗണ്ടിൽ നിന്ന് നീക്കം ചെയ്യാനോ ഉപയോക്താക്കൾക്ക് കഴിയും. ഗൂഗിളിന്റെ അത്യാധുനികമായ ‘മെറ്റീരിയൽ 3’ ഡിസൈൻ ശൈലിയിലാണ് പുതിയ വെബ്സൈറ്റ് ഒരുക്കിയിരിക്കുന്നത്. ഇത് മൊബൈൽ ആപ്പിന് സമാനമായ ലളിതവും വേഗതയേറിയതുമായ അനുഭവം കമ്പ്യൂട്ടറുകളിലും ഉറപ്പാക്കുന്നു.
സ്മാർട്ട്ഫോൺ കയ്യിലില്ലാത്ത സാഹചര്യങ്ങളിൽ പോലും ലാപ്ടോപ്പിലെ ഒരു ബ്രൗസർ വഴി ലോഗിൻ ചെയ്ത് ബാഗിലോ മറ്റോ വെച്ച ട്രാക്കറുകൾ കണ്ടെത്താം എന്നത് ഉപയോക്താക്കൾക്ക് വലിയ ആശ്വാസമാണ്. ഇതിനുപുറമെ, ലൊക്കേഷൻ വിവരങ്ങൾ പങ്കുവെച്ചിട്ടുള്ള വ്യക്തികളെ നിയന്ത്രിക്കാനായി ‘പീപ്പിൾ’ (People) എന്ന പ്രത്യേക ടാബും വെബ്സൈറ്റിൽ പുതുതായി ചേർത്തിട്ടുണ്ട്. വിമാനയാത്രയ്ക്കിടെ ലഗേജുകൾ ട്രാക്ക് ചെയ്യാനുള്ള സംവിധാനവും ഗൂഗിൾ മെസേജസ് ആപ്പുമായുള്ള സംയോജനവും ഫൈൻഡ് ഹബ്ബിനെ കൂടുതൽ കാര്യക്ഷമമാക്കുന്നു. ആഗോളതലത്തിൽ ഘട്ടംഘട്ടമായാണ് ഈ പുതിയ മാറ്റങ്ങൾ ഉപയോക്താക്കളിലേക്ക് എത്തുന്നത്.
About The Author
