ആഗോള സ്മാർട്ട്ഫോൺ വിപണിയിൽ ആപ്പിളിനെയും സാംസങ്ങിനെയും ഞെട്ടിച്ചുകൊണ്ട് ഹുവാവേ തങ്ങളുടെ പുതിയ വിപ്ലവകരമായ ഫോൾഡബിൾ ഫോൺ പുറത്തിറക്കി. വ്യവസായത്തിലെ തന്നെ ആദ്യത്തെ ‘തിരശ്ചീനമായി വീതിയുള്ള’ (Horizontally Wide) സ്ക്രീനുള്ള ഫോൾഡബിൾ സ്മാർട്ട്ഫോണായ ‘പുര എക്സ് മാക്സ്’ (Pura X Max) ആണ് ചൈനീസ് കമ്പനിയായ ഹുവാവേ അവതരിപ്പിച്ചിരിക്കുന്നത്. നിലവിൽ വിപണിയിലുള്ള മിക്ക ഫോൾഡബിൾ ഫോണുകളും നീളമേറിയ സ്ക്രീനുകൾ നൽകുമ്പോൾ, ഒരു പാസ്പോർട്ടിനോട് സാമ്യമുള്ള വീതിയേറിയ രൂപകൽപ്പനയാണ് ഹുവാവേ ഈ മോഡലിന് നൽകിയിരിക്കുന്നത്.
ഹുവാവേ സോഷ്യൽ മീഡിയയിൽ പങ്കുവെച്ച ചിത്രങ്ങൾ പ്രകാരം, ഈ പുതിയ ഫോൺ ഒരു ഐപാഡ് മിനിയോട് സാമ്യമുള്ള ആകൃതിയിലാണ് നിർമ്മിച്ചിരിക്കുന്നത്. സാധാരണ ഫോൾഡബിൾ ഫോണുകൾ മടക്കു തുറക്കുമ്പോൾ ചതുരാകൃതിയിലുള്ള ടാബ്ലെറ്റായി മാറുമെങ്കിൽ, പുര എക്സ് മാക്സ് 4:3 ആസ്പെക്ട് റേഷ്യോയിലാണ് സ്ക്രീൻ ഒരുക്കിയിരിക്കുന്നത്. സിനിമകൾ കാണുമ്പോഴും വായനയ്ക്കും കൂടുതൽ സ്വാഭാവികമായ അനുഭവം നൽകാൻ ഈ വൈഡ് ഡിസൈൻ സഹായിക്കും. എങ്കിലും, ഫോണിന്റെ വീതി കൂടുതലായതിനാൽ ഇത് കൈകാര്യം ചെയ്യുന്നത് അല്പം പ്രയാസകരമായേക്കാം എന്ന വിലയിരുത്തലുമുണ്ട്.
ഹുവാവേയുടെ ഈ നീക്കം ആപ്പിളിനും സാംസങ്ങിനും വലിയ വെല്ലുവിളിയാണ് ഉയർത്തുന്നത്. വരാനിരിക്കുന്ന മാസങ്ങളിൽ സമാനമായ വൈഡ് സ്ക്രീൻ ഫോണുകൾ പുറത്തിറക്കാൻ ഇരു കമ്പനികളും തയ്യാറെടുക്കുകയാണ്. സാംസങ് തങ്ങളുടെ പുതിയ വൈഡ് ഫോൾഡ് ഫോൺ ജൂലൈയിൽ പുറത്തിറക്കാൻ ഒരുങ്ങുമ്പോൾ, ആപ്പിൾ തങ്ങളുടെ ആദ്യത്തെ ഫോൾഡബിൾ ഫോൺ സെപ്റ്റംബറിൽ ഐഫോൺ 18 പരമ്പരയ്ക്കൊപ്പം അവതരിപ്പിച്ചേക്കും. സ്മാർട്ട്ഫോൺ വിപണിയിൽ പുതുമകൾ കുറയുന്ന പശ്ചാത്തലത്തിൽ, പ്രീമിയം ഉപഭോക്താക്കളെ ആകർഷിക്കാനാണ് കമ്പനികൾ ഇത്തരം പുതിയ രൂപത്തിലുള്ള ഫോണുകൾ പരീക്ഷിക്കുന്നത്.
ഹുവാവേ പുര എക്സ് മാക്സ് ഫോണിൽ പിന്നിൽ മൂന്ന് ക്യാമറകളാണ് നൽകിയിരിക്കുന്നത്. സ്ക്രീനിലെ മടക്ക് (Crease) പരമാവധി കുറയ്ക്കാനും കമ്പനി ശ്രദ്ധിച്ചിട്ടുണ്ട്. വെള്ള, ഓറഞ്ച്, പർപ്പിൾ എന്നീ മൂന്ന് നിറങ്ങളിൽ ലഭ്യമാകുന്ന ഈ ഫോണിന്റെ കൂടുതൽ സവിശേഷതകൾ ഏപ്രിൽ 21-ന് ഔദ്യോഗികമായി വെളിപ്പെടുത്തും. നിലവിൽ ചൈനയിൽ ഈ ഫോണിന്റെ പ്രീ-ഓർഡർ ആരംഭിച്ചു കഴിഞ്ഞു. വർഷങ്ങളായി ഫോൾഡബിൾ വിപണിയിൽ സജീവമായ ഹുവാവേയുടെ ഈ പുതിയ പരീക്ഷണം വരാനിരിക്കുന്ന ഐഫോൺ ഫോൾഡിന് കടുത്ത മത്സരമുയർത്തുമെന്നുറപ്പാണ്.
About The Author
