എഐ ഉപയോഗിച്ച് നിർമ്മിക്കുന്ന സംഗീതത്തിൽ യഥാർത്ഥ കലാകാരന്മാരുടെ പകർപ്പവകാശം സംരക്ഷിക്കാൻ ലക്ഷ്യമിട്ട് സോണി ഗ്രൂപ്പും യൂണിവേഴ്സൽ മ്യൂസിക് ഗ്രൂപ്പും (UMG) കൈകോർക്കുന്നു. എഐ നിർമ്മിത ഗാനങ്ങളിൽ ഒറിജിനൽ ട്രാക്കുകളുടെ സ്വാധീനം എത്രത്തോളമുണ്ടെന്ന് കണ്ടെത്താൻ ‘ന്യൂറൽ ഫിംഗർപ്രിന്റിംഗ്’ എന്ന അത്യാധുനിക സാങ്കേതികവിദ്യയാണ് സോണി അവതരിപ്പിച്ചിരിക്കുന്നത്. നിലവിലുള്ള കോപ്പിറൈറ്റ് സിസ്റ്റങ്ങളെക്കാൾ ഏറെ മുന്നിലായ ഈ സംവിധാനം, ഒരു പാട്ട് നേരിട്ട് പകർത്തിയില്ലെങ്കിൽ പോലും അതിന്റെ താളം, ശൈലി തുടങ്ങിയ ഘടകങ്ങൾ വിശകലനം ചെയ്ത് ഉറവിടം കണ്ടെത്താൻ പ്രാപ്തമാണ്.
സൗണ്ട് പട്രോളുമായി സഹകരിച്ചാണ് സോണി ഈ ഫോറൻസിക് എഐ മോഡൽ വികസിപ്പിച്ചത്. പഴയകാലത്തെ ഓഡിയോ മാച്ചിംഗ് രീതികളിൽ നിന്ന് വ്യത്യസ്തമായി, സംഗീതത്തിന്റെ ആഴത്തിലുള്ള അർത്ഥവും ഘടനയും മനസ്സിലാക്കുന്ന ‘ന്യൂറൽ എംബഡിംഗ്സ്’ ആണ് ഇതിൽ ഉപയോഗിക്കുന്നത്. ഇതിലൂടെ ഒരു എഐ ഗാനം ഏതൊക്കെ കലാകാരന്മാരുടെ ശൈലിയാണ് കടമെടുത്തതെന്ന് കൃത്യമായ ശതമാനക്കണക്കിൽ വെളിപ്പെടുത്താൻ സാധിക്കും. ഉദാഹരണത്തിന്, ഒരു പ്രത്യേക ട്രാക്ക് 30% ബീറ്റിൽസിന്റെയും 10% ക്വീനിന്റെയും സംഗീതത്തോട് സാമ്യമുള്ളതാണെന്ന് ഈ സംവിധാനം തിരിച്ചറിയും.
എഐ ഡെവലപ്പർമാർ സഹകരിക്കാൻ തയ്യാറാകാത്ത സാഹചര്യങ്ങളിൽ പോലും പുറത്തുനിന്നുള്ള പരിശോധനയിലൂടെ മോഷണം കണ്ടെത്താൻ ഈ ടെക്നോളജിക്ക് കഴിയും. ഇതിനോടൊപ്പം തന്നെ ‘അൺലേണിംഗ്’ എന്ന വിദ്യയും സോണി പരീക്ഷിക്കുന്നുണ്ട്. ഒരു വലിയ എഐ മോഡലിന് നൽകിയ ട്രെയിനിംഗ് ഡാറ്റയിൽ നിന്ന് ഒരു പ്രത്യേക കലാകാരന്റെ പാട്ടുകൾ ഒഴിവാക്കിയാൽ ആ എഐയുടെ ഔട്ട്പുട്ടിൽ എന്ത് മാറ്റം വരുന്നു എന്ന് പരിശോധിക്കുന്നതിലൂടെ ആ കലാകാരന്റെ സ്വാധീനം അളക്കാൻ സാധിക്കും.
എഐ ഉപയോഗിക്കുന്ന കലാകാരന്മാരെ എതിർക്കുന്നതിന് പകരം, അവർക്ക് ലൈസൻസുള്ള ഡാറ്റ നൽകുകയും അതിലൂടെ യഥാർത്ഥ കലാകാരന്മാർക്ക് അർഹമായ റോയൽറ്റി ഉറപ്പാക്കുകയുമാണ് സോണിയുടെ ലക്ഷ്യം. ഭാവിയിൽ സ്ട്രീമിംഗ് പ്ലാറ്റ്ഫോമുകളിൽ എഐ ഗാനങ്ങൾ അപ്ലോഡ് ചെയ്യുമ്പോൾ തന്നെ ഈ പരിശോധന നിർബന്ധമാക്കിയേക്കും. പകർപ്പവകാശ തർക്കങ്ങളിൽ ഒരു നിർണ്ണായക തെളിവായി ഈ സാങ്കേതികവിദ്യ മാറുമെന്നാണ് സംഗീത ലോകം വിലയിരുത്തുന്നത്.
About The Author
