ലോകത്തെ മുൻനിര ഐ.ടി സേവനദാതാക്കൾ എന്ന നിലയിൽ നിന്ന് സ്വന്തമായി നിർമ്മിത ബുദ്ധി ഉൽപ്പന്നങ്ങൾ നിർമ്മിക്കുന്ന ആഗോള ശക്തിയായി ഭാരതം മാറുകയാണ്. പ്രധാനമന്ത്രി നരേന്ദ്രമോദിയുടെ നേതൃത്വത്തിൽ ലോകത്തെ ആദ്യ മൂന്ന് എ.ഐ മഹാശക്തികളിൽ ഒന്നായി ഇന്ത്യയെ മാറ്റുക എന്ന ലക്ഷ്യത്തിലേക്കുള്ള ഏറ്റവും വലിയ ചുവടുവെപ്പാണ് അടുത്തിടെ പ്രഖ്യാപിക്കപ്പെട്ട എ.ഐ സൂപ്പർ കമ്പ്യൂട്ടർ പദ്ധതി. ന്യൂഡൽഹിയിൽ നടന്ന ‘എ.ഐ ഇമ്പാക്ട് സമ്മിറ്റ് 2026’-ൽ യു.എ.ഇയുമായി ചേർന്ന് ഇന്ത്യയിൽ ഈ അത്യാധുനിക സൂപ്പർ കമ്പ്യൂട്ടർ സ്ഥാപിക്കാനുള്ള സുപ്രധാന പ്രഖ്യാപനമുണ്ടായി.
എട്ട് എക്സാ ഫ്ലോപ്പ് (Exaflop) ശേഷിയുള്ള ഈ കമ്പ്യൂട്ടർ ഇന്ത്യയുടെ ആഭ്യന്തര എ.ഐ വികസനത്തിന് വൻ കരുത്തു പകരും. ഭാരതത്തിന്റെ സെന്റർ ഫോർ ഡെവലപ്മെന്റ് ഓഫ് അഡ്വാൻസ്ഡ് കമ്പ്യൂട്ടിങ് (C-DAC), അബുദാബിയിലെ ജി 42, മുഹമ്മദ് ബിൻ സായിദ് യൂണിവേഴ്സിറ്റി ഓഫ് ആർട്ടിഫിഷ്യൽ ഇന്റലിജൻസ്, അമേരിക്കൻ ചിപ്പ് നിർമ്മാതാക്കളായ സെർബ്രാസ് (Cerebras) എന്നിവർ സംയുക്തമായാണ് ഈ ബൃഹത്തായ പദ്ധതി യാഥാർത്ഥ്യമാക്കുന്നത്.
ഈ പദ്ധതിയുടെ ഏറ്റവും വലിയ ആകർഷണം ഡാറ്റാ സുരക്ഷയും പരമാധികാരവുമാണ്. ഇന്ത്യയുടെ ഡാറ്റാ സുരക്ഷ ഉറപ്പാക്കുന്നതിനായി പൂർണ്ണമായും ഭാരതത്തിൽ സ്ഥാപിക്കുന്ന ഈ സംവിധാനം രാജ്യത്തിന്റെ നേരിട്ടുള്ള നിയന്ത്രണത്തിലായിരിക്കും പ്രവർത്തിക്കുക. വലിയ ഡാറ്റാ സെറ്റുകൾ എളുപ്പത്തിൽ കൈകാര്യം ചെയ്യാനും എ.ഐ മോഡലുകളുടെ പരിശീലനവും ഗവേഷണ പ്രവർത്തനങ്ങളും വേഗത്തിലാക്കാനും ഇത് സഹായിക്കും. സാങ്കേതികവിദ്യ, പ്രതിരോധം, ബഹിരാകാശം, ഊർജ്ജം തുടങ്ങിയ മേഖലകളിൽ ഇന്ത്യ-യു.എ.ഇ സാങ്കേതിക നയതന്ത്ര ബന്ധത്തിലെ ഒരു നാഴികക്കല്ല് കൂടിയാണിത്.
About The Author
