നഗ്നനേത്രങ്ങൾ കൊണ്ട് കാണാൻ പ്രയാസമുള്ള അത്രയും ചെറിയ ഒരു യന്ത്രത്തിന് എന്തുചെയ്യാൻ കഴിയും? ഉപ്പിന്റെ ഒരു തരിയേക്കാൾ വലിപ്പം കുറഞ്ഞ, എന്നാൽ സ്വന്തമായി ചിന്തിക്കാനും സഞ്ചരിക്കാനും ശേഷിയുള്ള ഒരു വമ്പൻ റോബോട്ട് നിരയെ വികസിപ്പിച്ചെടുത്തിരിക്കുകയാണ് ഒരു കൂട്ടം ഗവേഷകർ. പെൻസിൽവാനിയ, മിഷിഗൺ സർവ്വകലാശാലകളിലെ എഞ്ചിനീയർമാർ ചേർന്നാണ് ലോകത്തെ ഏറ്റവും ചെറിയ ഈ സോളാർ റോബോട്ടുകളെ നിർമ്മിച്ചത്. അത്യാധുനികമായ ഈ ഓരോ റോബോട്ടിനും നിർമ്മാണച്ചെലവ് വരുന്നത് കേവലം ഒരു പൈസ മാത്രമാണ് എന്നതാണ് മറ്റൊരു പ്രത്യേകത.
സാധാരണ യന്ത്രഭാഗങ്ങൾക്ക് പകരം വൈദ്യുത തരംഗങ്ങൾ ഉപയോഗിച്ച് ദ്രാവക തന്മാത്രകളെ ചലിപ്പിക്കുന്ന നൂതനമായ പ്രൊപ്പൽഷൻ രീതിയാണ് ഇതിൽ പരീക്ഷിച്ചിരിക്കുന്നത്. 75 നാനോ വാട്ട്സ് എന്ന അതീവ കുറഞ്ഞ ഊർജ്ജത്തിൽ പ്രവർത്തിക്കുന്ന ഇവയ്ക്ക് മാസങ്ങളോളം തുടർച്ചയായി സഞ്ചരിക്കാൻ സാധിക്കും. ഊർജ്ജത്തിനായി ശരീരത്തിൽ ഘടിപ്പിച്ചിട്ടുള്ള മൈക്രോ സോളാർ പാനലുകളെയാണ് ഇവ ആശ്രയിക്കുന്നത്. വൈദ്യശാസ്ത്ര രംഗത്ത് ഏറെ സംഭാവനകൾ നൽകാൻ ഈ റോബോട്ടിനു സാധിക്കും.
നിലവിൽ ശരീരത്തിനുള്ളിലെ തകരാറുകൾ കണ്ടെത്താൻ ശസ്ത്രക്രിയകളോ സങ്കീർണ്ണമായ സ്കാനിംഗുകളോ ആവശ്യമായി വരുന്ന സ്ഥാനത്ത്, ആയിരക്കണക്കിന് മൈക്രോ റോബോട്ടുകളെ ഒരു സൈന്യത്തെപ്പോലെ ശരീരത്തിനുള്ളിലേക്ക് കടത്തിവിട്ട് ഓരോ കോശത്തിന്റെയും ആരോഗ്യം തത്സമയം നിരീക്ഷിക്കാൻ സാധിക്കും. ക്യാൻസർ പോലുള്ള മാരക രോഗങ്ങൾ ബാധിച്ച കോശങ്ങളെ കൃത്യമായി തിരിച്ചറിയാനും, ആരോഗ്യമുള്ള മറ്റ് കോശങ്ങളെ ബാധിക്കാതെ തന്നെ രോഗബാധിത പ്രദേശങ്ങളിൽ നേരിട്ട് മരുന്നുകൾ എത്തിക്കാനും ഈ സാങ്കേതികവിദ്യ സഹായിക്കും. ഇത് ചികിത്സയുടെ പാർശ്വഫലങ്ങൾ ഗണ്യമായി കുറയ്ക്കാൻ കാരണമാകും.
വൈദ്യശാസ്ത്രത്തിന് പുറമെ നാനോ ടെക്നോളജി നിർമ്മാണ മേഖലയിലും ഈ റോബോട്ടുകൾ വലിയ സ്വാധീനം ചെലുത്തും. അതിസൂക്ഷ്മമായ സെൻസറുകളും ചിപ്പുകളും നിർമ്മിക്കുന്ന ഘട്ടത്തിൽ മനുഷ്യർക്കോ വലിയ യന്ത്രങ്ങൾക്കോ ചെയ്യാൻ കഴിയാത്തത്ര സൂക്ഷ്മമായ ജോലികൾ ഇവയെ ഏൽപ്പിക്കാൻ കഴിയും. വെറും ഒരു പൈസ മാത്രം നിർമ്മാണച്ചെലവുള്ളതിനാൽ, ലക്ഷക്കണക്കിന് റോബോട്ടുകളെ ഒരേസമയം വിന്യസിച്ച് അതിവേഗത്തിൽ സങ്കീർണ്ണമായ ഘടനകൾ നിർമ്മിച്ചെടുക്കാം. കൂടാതെ പരിസ്ഥിതി മലിനീകരണം കണ്ടെത്താനും ജലസ്രോതസ്സുകളിലെ വിഷാംശങ്ങൾ പരിശോധിക്കാനും ഇവയെ ഉപയോഗപ്പെടുത്താം. വലിയ ഊർജ്ജസ്രോതസ്സുകളുടെ സഹായമില്ലാതെ വെളിച്ചത്തിൽ നിന്ന് മാത്രം കരുത്ത് സംഭരിച്ച് മാസങ്ങളോളം പണിയെടുക്കാൻ കഴിയുന്ന ഈ യന്ത്രങ്ങൾ, ഭാവിയിൽ മനുഷ്യന് അപ്രാപ്യമായ മേഖലകളിൽ പോലും വിശ്വസ്തരായ സഹായികളായി മാറും.
About The Author
