മൈക്രോമാക്സ് ഇന്‍ സീരിസ് സ്മാര്‍ട്ട്ഫോണുകള്‍ ഇന്ത്യയില്‍

ഇന്ത്യന്‍ കമ്പനിയായ മൈക്രോമാക്സിന്‍റെ “ഇൻ” സീരീസ് സ്മാര്‍ട്ട്ഫോണുകളായി മൈക്രോമാക്സ് ഇൻ നോട്ട് 1, മൈക്രോമാക്സ് ഇൻ 1ബി എന്നിവ വിപണിയില്‍ പുറത്തിറക്കിയിരിക്കുന്നു. ആൻഡ്രോയിഡ് 10 ൽ പ്രവര്‍ത്തിക്കുന്ന ഇരു ഹാന്‍ഡ്സെറ്റിലും മീഡിയടെക് ചിപ്പ്സെറ്റാണ് നല്‍കിയിരിക്കുന്നത്. പുതിയ സ്മാർട്ട്‌ഫോണുകളിൽ രണ്ട് വർഷത്തെ സോഫ്റ്റ് വെയർ അപ്‌ഡേറ്റുകൾ വാഗ്ദാനം ചെയ്യുമെന്നും കമ്പനി വാഗ്ദാനം ചെയ്തിട്ടുണ്ട്.

ഗുരുഗ്രാം ആസ്ഥാനമായുള്ള കമ്പനി ഒരു കാലത്ത് ഇന്ത്യൻ മൊബൈൽ ഫോൺ വിപണിയിൽ മുൻനിരയിലായിരുന്നു. എന്നാല്‍, രാജ്യത്ത് ഒപ്പോ, വിവോ, ഷവോമി എന്നിവയുൾപ്പെടെയുള്ള ചൈനീസ് ബ്രാൻഡുകളുടെ ആധിപത്യം വളർന്നപ്പോള്‍ ഈ ഇന്ത്യന്‍ ബ്രാന്‍ഡ് പിന്‍നിരയിലേക്ക് തളളപ്പെടുകയായിരുന്നു. ‘മെയ്ക്ക് ഇൻ ഇന്ത്യ’ സംരംഭത്തിന്‍റെ ഭാഗമായി വീണ്ടും ഉയര്‍ത്തെണീറ്റിരിക്കുകയാണ് കമ്പനിയിപ്പോള്‍.

മൈക്രോമാക്സ് ഇന്‍ നോട്ട് 1 ഇന്ത്യയിൽ 4 ജിബി റാം + 64 ജിബി സ്റ്റോറേജ്, 4 ജിബി റാം + 128 ജിബി സ്റ്റോറേജ് എന്നിങ്ങനെ രണ്ട് വേരിയന്‍റില്‍ ലഭ്യമാണ്. ഇവയ്ക്ക് യഥാക്രമം 10999 രൂപയും 12499 രൂപയുമാണ് വില. എന്നാല്‍ ഇതില്‍ നിന്നും വ്യത്യസ്തമായി മൈക്രോമാക്സ് ഇൻ 1ബി 2 ജിബി റാം + 32 ജിബി സ്റ്റോറേജ്, 4 ജിബി റാം + 64 ജിബി സ്റ്റോറേജ് എന്നീ രണ്ട് വേരിയന്‍റുകള്‍ക്കും 6999 രൂപ, 7999 രൂപ എന്നിങ്ങനെയാണ് വിലകള്‍.

മൈക്രോമാക്സ് ഇൻ നോട്ട് 1 മോഡല്‍ പച്ച, വെളുപ്പ് എന്നീ നിറങ്ങളിൽ ലഭ്യമാണ്. നവംബർ 24 മുതൽ വിൽപ്പനയ്‌ക്കെത്തും. എന്നാല്‍, മൂന്ന് വ്യത്യസ്ത നിറങ്ങളില്‍ അവതരിപ്പിച്ചിട്ടുള്ള മൈക്രോമാക്‌സ് ഇൻ 1ബി നവംബർ 26 മുതലാണ് വിപണിയില്‍ ലഭ്യമാക്കുക.

ഇരു ഫോണുകളും ഫ്ലിപ്കാർട്ട് വഴിയും മൈക്രോമാക്സ് വെബ്സൈറ്റ് വഴിയും വാങ്ങാൻ ലഭ്യമാണ്.

മൈക്രോമാക്സ് ഇൻ നോട്ട് 1

ഡ്യുവൽ സിം (നാനോ) പിന്തുണയുള്ള ഇന്‍ നോട്ട് 1 ആൻഡ്രോയിഡ് 10 ൽ പ്രവർത്തിക്കുന്നു, കൂടാതെ 6.67 ഇഞ്ച് ഫുൾ എച്ച്ഡി + ഡിസ്പ്ലേയും ഹോൾ-പഞ്ച് ഡിസൈനും ഉൾക്കൊള്ളുന്നു. ഫോണില്‍ ഒക്ടാകോർ മീഡിയടെക് ഹീലിയോ ജി 85 Soc യും 4 ജിബി റാമും ഉണ്ട്. 48 മെഗാപിക്സൽ പ്രൈമറി സെൻസറും 5 മെഗാപിക്സൽ സെക്കൻഡറി സെൻസറും വൈഡ് ആംഗിൾ ക്യാമറ ഉൾക്കൊള്ളുന്ന ക്വാഡ് റിയർ ക്യാമറ സജ്ജീകരണവുമായാണ് ഫോൺ തയ്യാറാക്കിയിരിക്കുന്നത്. മാക്രോ ഷോട്ടുകൾക്കും ഡെപ്ത് സെൻസിംഗിനുമായി 2 മെഗാപിക്സലിന്‍റെ രണ്ട് സെൻസറുകളും ഉണ്ട്. കൂടാതെ, ക്യാമറ സജ്ജീകരണം ഒരു എൽഇഡി ഫ്ലാഷുമായി ജോടിയാക്കിയിരിക്കുന്നു, കൂടാതെ നൈറ്റ് വിഷൻ സപ്പോർട്ട് ഉൾപ്പെടെയുള്ള ആർട്ടിഫിഷ്യൽ ഇന്‍റലിജൻസ് (എഐ) പിന്തുണയുള്ള സവിശേഷതകളാണ് ഇത് നൽകുന്നത്.

സെൽഫികൾക്കായി, മൈക്രോമാക്സ് ഇൻ നോട്ട് 1 മുൻവശത്ത് 16 മെഗാപിക്സൽ ക്യാമറ സെൻസറും 78 ഡിഗ്രി വൈഡ് ആംഗിൾ ലെൻസും ഉണ്ട്. സാധാരണ ഫോട്ടോകൾക്കും വീഡിയോകൾക്കുമൊപ്പം സെൽഫി ക്യാമറ സെൻസറിന് GIF- കൾ ഷൂട്ട് ചെയ്യാൻ കഴിയും.

മൈക്രോ എസ്ഡി കാർഡ് വഴി വികസിപ്പിക്കാവുന്ന 128 ജിബി വരെ ഓൺബോർഡ് സ്റ്റോറേജുള്ള മൈക്രോമാക്സ് ഇൻ നോട്ട് 1 സ്മാര്‍ട്ട്ഫോണില്‍ 4 ജി വോൾട്ട്, വൈ-ഫൈ, ബ്ലൂടൂത്ത്, ജിപിഎസ് / എ-ജിപിഎസ്, യുഎസ്ബി ടൈപ്പ്-സി, 3.5mm ഹെഡ്‌ഫോൺ ജാക്ക് എന്നിവ കണക്റ്റിവിറ്റി ഓപ്ഷനുകളായി ഉൾപ്പെടുന്നു.

റിയര്‍പാനലില്‍ ഫിംഗർപ്രിന്‍റ് സെൻസറുള്ള ഫോണില്‍ റിവേഴ്സ് ചാർജ്ജിംഗിനെയും 18W ഫാസ്റ്റ് ചാർജ്ജിംഗിനെയും പിന്തുണയ്ക്കുന്ന 5000 എംഎഎച്ച് ബാറ്ററിയാണ് നല്‍കിയിരിക്കുന്നത്.

മൈക്രോമാക്സ് ഇന്‍ 1ബി

ഡ്യുവൽ സിം (നാനോ) പിന്തുണയോട് കൂടിയ മൈക്രോമാക്‌സ് ഇൻ 1ബി ആൻഡ്രോയിഡ് 10 ൽ പ്രവർത്തിക്കുന്നു. 6.52 ഇഞ്ച് എച്ച്ഡി + ഡിസ്‌പ്ലേ, വാട്ടർ ഡ്രോപ്പ്-സ്റ്റൈൽ നോച്ച്. 2 ജിബി, 4 ജിബി റാം ഓപ്ഷനുകളുമായി ജോടിയാക്കിയ ഒക്ടാകോർ മീഡിയടെക് ഹീലിയോ ജി 35 Soc ആണ് ഫോണിന്‍റെ കരുത്ത്.

13 മെഗാപിക്സൽ പ്രൈമറി ക്യാമറ സെൻസറും എഫ്/ 1.8 ലെൻസും 2 മെഗാപിക്സൽ ഡെപ്ത് സെൻസറും എൽഇഡി ഫ്ലാഷിനൊപ്പം ഡ്യുവൽ റിയർ ക്യാമറ സജ്ജീകരണവും. മുൻവശത്ത് 8 മെഗാപിക്സൽ സെൽഫി ക്യാമറ സെൻസറുമാണ് പ്രധാന ക്യാമറ സവിശേഷതകളാണ് ഫോണിലുള്ളത്.

മൈക്രോമാക്സ് ഇൻ 1ബി 32 ജിബി, 64 ജിബി ഓൺബോർഡ് സ്റ്റോറേജ് ഓപ്ഷനുകളില്‍ ലഭ്യമാണ്. ഇവ രണ്ടും മൈക്രോ എസ്ഡി കാർഡ് വഴി വികസിപ്പിക്കാവുന്നതാണ്. കണക്റ്റിവിറ്റി ഓപ്ഷനുകളിൽ 4ജി വോൾട്ട്, വൈ-ഫൈ, ബ്ലൂടൂത്ത്, ജിപിഎസ് / എ-ജിപിഎസ്, യുഎസ്ബി ടൈപ്പ്-സി, 3.5mm ഹെഡ്‌ഫോൺ ജാക്ക് എന്നിവ ഉൾപ്പെടുന്നു. റിയര്‍ പാനലിൽ ഫിംഗർപ്രിന്‍റ് സെൻസറുമുള്ള ഇന്‍ 1ബി സ്മാര്‍ട്ട്ഫോണില്‍ റിവേഴ്സ് ചാർജ്ജിംഗിനും 10W ഫാസ്റ്റ് ചാർജ്ജിംഗിനും പിന്തുണ നൽകുന്ന 5000 എംഎഎച്ച് ബാറ്ററിയാണ് ഉള്ളത്.

About The Author

Correspondent

See author's posts