ആർട്ടിഫിഷ്യൽ ഇന്റലിജൻസ് (എഐ) ഉപയോഗിച്ച് മറ്റൊരാളുടെ ശബ്ദം അനുകരിച്ച് നടത്തുന്ന തട്ടിപ്പുകൾ വർധിച്ചുവരുന്ന സാഹചര്യത്തിൽ, ആൻഡ്രോയിഡ് ഉപയോക്താക്കളെ സംരക്ഷിക്കാൻ പുതിയ സുരക്ഷാ ഫീച്ചർ അവതരിപ്പിച്ച് ഗൂഗിൾ. ‘ഫേക്ക് കോൾ ഡിറ്റക്ഷൻ’ (Fake Call Detection) എന്ന പേരിലുള്ള ഈ സംവിധാനം, എഐ സഹായത്തോടെ ശബ്ദം പകർത്തി നടത്തുന്ന വ്യാജ ഫോൺകോളുകൾ തിരിച്ചറിഞ്ഞ് ഉപയോക്താക്കൾക്ക് മുന്നറിയിപ്പ് നൽകും.
മൊബൈൽ വ്യവസായത്തിൽ ഇത്തരത്തിലുള്ള ആദ്യ സംവിധാനമാണിതെന്നാണ് ഗൂഗിളിന്റെ അവകാശവാദം. കുടുംബാംഗങ്ങളുടെയോ സുഹൃത്തുക്കളുടെയോ വിശ്വസ്തരായ വ്യക്തികളുടെയോ ശബ്ദം അനുകരിച്ച് അടിയന്തര സാമ്പത്തിക സഹായം ആവശ്യപ്പെടുന്ന തട്ടിപ്പുകൾ അടുത്തകാലത്ത് ഗണ്യമായി വർധിച്ചിട്ടുണ്ട്. കോളർ ഐഡി വ്യാജമാക്കുന്നതും എഐ ശബ്ദ ക്ലോണിങ് സാങ്കേതികവിദ്യയും ഉപയോഗിച്ചാണ് ഇത്തരം തട്ടിപ്പുകൾ നടക്കുന്നത്.
Phone by Google ആപ്പ് ഉപയോഗിക്കുന്ന രണ്ട് ആൻഡ്രോയിഡ് ഉപയോക്താക്കൾ തമ്മിലുള്ള കോളുകളിലാണ് ഈ സംവിധാനം പ്രവർത്തിക്കുക. യഥാർത്ഥ കോൾ നടത്തുമ്പോൾ, കോളർ ഫോണിൽ നിന്ന് സുരക്ഷിതമായ ഒരു വെരിഫിക്കേഷൻ സിഗ്നൽ ആർസിഎസ് (RCS) സാങ്കേതികവിദ്യയുടെ എൻഡ്-ടു-എൻഡ് എൻക്രിപ്ഷൻ വഴി സ്വീകരിക്കുന്നയാളുടെ ഫോണിലേക്ക് കൈമാറും.
ഗൂഗിൾ ഇതിനെ ഒരു “ഡിജിറ്റൽ ഹാൻഡ്ഷേക്ക്” എന്നാണ് വിശേഷിപ്പിക്കുന്നത്. കോൺടാക്റ്റ് ലിസ്റ്റിലുള്ള ഒരാളാണെന്ന് അവകാശപ്പെട്ട് ഒരു കോൾ ലഭിക്കുമ്പോൾ ആവശ്യമായ വെരിഫിക്കേഷൻ ലഭ്യമല്ലെങ്കിൽ, ആ വ്യക്തിയുടെ യഥാർത്ഥ ഉപകരണവുമായി ആൻഡ്രോയിഡ് പരിശോധിക്കും. ആ വ്യക്തി കോൾ ചെയ്യുന്നില്ലെന്ന് സ്ഥിരീകരിക്കപ്പെട്ടാൽ, “പരിചയമുള്ള ഒരാളായി നടിച്ച് ആരെങ്കിലും വിളിക്കുകയാണ്” എന്ന മുന്നറിയിപ്പ് സ്ക്രീനിൽ പ്രദർശിപ്പിക്കും. അത്തരം സാഹചര്യത്തിൽ കോൾ ഉടൻ അവസാനിപ്പിക്കാനും ഉപയോക്താവിനോട് നിർദേശിക്കും.
സ്വകാര്യത സംരക്ഷിക്കുന്ന രീതിയിലാണ് സംവിധാനം രൂപകൽപ്പന ചെയ്തിരിക്കുന്നതെന്നും, എല്ലാ വിവര കൈമാറ്റങ്ങളും എൻക്രിപ്റ്റ് ചെയ്തതായിരിക്കുമെന്നും ഗൂഗിൾ വ്യക്തമാക്കി. ഫീച്ചർ ഡിഫോൾട്ടായി പ്രവർത്തനക്ഷമമാക്കിയിരിക്കുമെങ്കിലും, ഉപയോക്താക്കൾക്ക് ആവശ്യമെങ്കിൽ അത് ഓഫ് ചെയ്യാനാകും.
എഐ അടിസ്ഥാനമാക്കിയുള്ള സാമ്പത്തിക തട്ടിപ്പുകൾ ആഗോളതലത്തിൽ വലിയ ആശങ്കയാകുന്ന സാഹചര്യത്തിലാണ് ഗൂഗിളിന്റെ പുതിയ നീക്കം. 2026 മാർച്ചിൽ പ്രസിദ്ധീകരിച്ച ഇന്റർപോളിന്റെ ഗ്ലോബൽ ഫിനാൻഷ്യൽ ഫ്രോഡ് ത്രെറ്റ് അസസ്മെന്റ് റിപ്പോർട്ട് പ്രകാരം, വ്യക്തിത്വം അനുകരിച്ചുള്ള തട്ടിപ്പുകൾ മൂലം ലോകമെമ്പാടുമായി 400 ബില്യൺ ഡോളറിലധികം നഷ്ടം ഉണ്ടായിട്ടുണ്ട്. അമേരിക്കയിൽ മാത്രം 2024-ൽ ഇത്തരം തട്ടിപ്പുകൾ ഏകദേശം 3 ബില്യൺ ഡോളറിന്റെ നഷ്ടമുണ്ടാക്കിയതായും റിപ്പോർട്ടുകൾ വ്യക്തമാക്കുന്നു.
പരമ്പരാഗത കോളർ ഐഡി സംവിധാനങ്ങളെ മറികടക്കാൻ തട്ടിപ്പുകാർക്ക് ഇന്ന് കൂടുതൽ ശക്തമായ സ്പൂഫിങ് ഉപകരണങ്ങളും യഥാർത്ഥ ശബ്ദത്തോട് സാമ്യമുള്ള എഐ ക്ലോണിങ് സാങ്കേതികവിദ്യകളും ലഭ്യമാണെന്ന് ഗൂഗിൾ ചൂണ്ടിക്കാട്ടുന്നു.
ആൻഡ്രോയിഡ് 12 അല്ലെങ്കിൽ അതിനുമുകളിലുള്ള പതിപ്പുകളിൽ പ്രവർത്തിക്കുന്ന ഉപകരണങ്ങളിൽ ഈ മാസം മുതൽ ഫീച്ചർ ആഗോളതലത്തിൽ ലഭ്യമാക്കിത്തുടങ്ങും. ആദ്യഘട്ടത്തിൽ ഗൂഗിളിന്റെ പിക്സൽ സ്മാർട്ട്ഫോണുകളിലാണ് ഇത് എത്തുക. അനുയോജ്യമായ മറ്റ് ആൻഡ്രോയിഡ് ഉപയോക്താക്കൾക്ക് പ്ലേ സ്റ്റോറിൽ നിന്ന് Phone by Google ആപ്പ് ഇൻസ്റ്റാൾ ചെയ്ത് ഡിഫോൾട്ട് കോൾ ആപ്പായി തിരഞ്ഞെടുക്കുന്നതിലൂടെ ഈ സുരക്ഷാ സംവിധാനം ഉപയോഗിക്കാനാകും.
ഗൂഗിൾ മെസേജസിലെ എഐ അധിഷ്ഠിത സ്കാം ഡിറ്റക്ഷൻ സംവിധാനത്തിന്റെയും ആർസിഎസ് അടിസ്ഥാനമാക്കിയുള്ള സ്ഥിരീകരിച്ച ബിസിനസ് കമ്മ്യൂണിക്കേഷന്റെയും തുടർച്ചയായാണ് ആൻഡ്രോയിഡ് പ്ലാറ്റ്ഫോമിലെ തട്ടിപ്പ് പ്രതിരോധ സംവിധാനങ്ങൾ കൂടുതൽ ശക്തമാക്കാനുള്ള ഗൂഗിളിന്റെ പുതിയ നീക്കം.
About The Author
