കമ്പ്യൂട്ടറിലെ മൗസ് കർസർ അല്പം ചലിപ്പിച്ചാൽ തന്നെ ഉപയോക്താവ് എന്താണ് അന്വേഷിക്കുന്നത് എന്ന് തിരിച്ചറിഞ്ഞ് സഹായിക്കുന്ന പുതിയ സാങ്കേതികവിദ്യയുമായി ഗൂഗിൾ ഡീപ്മൈൻഡ്. ‘മാജിക് പോയിന്റർ’ എന്ന പേരിലുള്ള ഈ എഐ അധിഷ്ഠിത സംവിധാനം, കൃത്രിമ ബുദ്ധിയുടെ ഉപയോഗരീതിയെ കൂടുതൽ ലളിതവും സ്വാഭാവികവുമായി മാറ്റുമെന്നാണ് വിലയിരുത്തൽ.
സാധാരണയായി എഐ സേവനങ്ങൾ ഉപയോഗിക്കുമ്പോൾ ഉപയോക്താക്കൾ ഉള്ളടക്കം കോപ്പി ചെയ്ത് പ്രത്യേക ആപ്പുകളിൽ പേസ്റ്റ് ചെയ്യുകയോ, ആവശ്യങ്ങൾ പ്രത്യേകം ടൈപ്പ് ചെയ്യുകയോ വേണം. എന്നാൽ മാജിക് പോയിന്റർ ഉപയോഗിക്കുമ്പോൾ ഈ അധിക നടപടികൾ വേണ്ടിവരില്ല.
സ്ക്രീനിൽ കാണുന്ന ഒരു ചിത്രത്തിന്റെയോ വാചകത്തിന്റെയോ മുകളിലേക്ക് മൗസ് കർസർ കൊണ്ടുവന്ന് ചെറിയ രീതിയിൽ ചലിപ്പിച്ചാൽ മതി. അതോടെ ജെമിനി എഐ സജീവമായി, ഉപയോക്താവ് അടുത്തതായി ചെയ്യാൻ സാധ്യതയുള്ള കാര്യങ്ങൾ നിർദ്ദേശിക്കാൻ തുടങ്ങും.
ഉദാഹരണത്തിന്, ഒരു ചിത്രത്തിന് കൂടുതൽ വിവരങ്ങൾ കണ്ടെത്തുക, ഒരു ലേഖനം ചുരുക്കി നൽകുക, സന്ദേശം തയ്യാറാക്കുക, അല്ലെങ്കിൽ ഓൺലൈൻ തിരച്ചിൽ നടത്തുക തുടങ്ങിയ നിർദേശങ്ങൾ സ്വമേധയാ ലഭ്യമാകും. ഉപയോക്താവിന്റെ പ്രവർത്തന പശ്ചാത്തലം സ്വയം മനസ്സിലാക്കിയാണ് എഐ പ്രതികരിക്കുന്നത്.
ആൻഡ്രോയിഡ് ഫോണുകളിലെ ‘സർക്കിൾ ടു സെർച്ച്’ സൗകര്യവുമായി സാമ്യമുള്ള രീതിയിലാണ് ഈ സംവിധാനം പ്രവർത്തിക്കുന്നത്. എന്നാൽ മൊബൈൽ ഫോണുകൾക്ക് പുറത്തേക്കും കമ്പ്യൂട്ടർ ഉപയോഗത്തിലേക്കും ഈ അനുഭവം വ്യാപിപ്പിക്കുകയാണ് ഗൂഗിളിന്റെ ലക്ഷ്യമെന്ന് സാങ്കേതിക വിദഗ്ധർ വിലയിരുത്തുന്നു.
കൃത്രിമ ബുദ്ധിയെ കൂടുതൽ സ്വാഭാവികവും മനുഷ്യരുടെ ദൈനംദിന ഉപയോഗവുമായി ചേർന്നതുമായ രീതിയിലേക്ക് മാറ്റാനുള്ള പുതിയ ശ്രമമായാണ് ‘മാജിക് പോയിന്റർ’ വിലയിരുത്തപ്പെടുന്നത്.
About The Author
