ഒരു യന്ത്രമനുഷ്യൻ നിങ്ങളെ തൊടുന്നത് മനുഷ്യസഹജമായ കൃത്യതയോടെയാണെങ്കിലോ? ആലോചിക്കുമ്പോൾ അത്ഭുതം തോന്നാമെങ്കിലും റോബോട്ടിക്സ് രംഗത്ത് അത്തരമൊരു വിപ്ലവകരമായ മാറ്റത്തിന് തുടക്കമായിരിക്കുകയാണ്. മനുഷ്യന്റെ ചർമ്മത്തിന് സമാനമായ രീതിയിൽ സ്പർശനവും സാമീപ്യവും തിരിച്ചറിയാൻ കഴിയുന്ന പുതിയ തരം ‘ഇലക്ട്രോണിക് സ്കിൻ’ വികസിപ്പിച്ചിരിക്കുകയാണ് സൗത്ത് ചൈന യൂണിവേഴ്സിറ്റി ഓഫ് ടെക്നോളജിയിലെ ഗവേഷകർ.
സാധാരണയായി റോബോട്ടുകൾക്ക് ഒന്നുകിൽ ദൂരെയുള്ള വസ്തുക്കളെ കാണാൻ കഴിയും, അല്ലെങ്കിൽ തൊടുമ്പോൾ ഉണ്ടാകുന്ന മർദ്ദം തിരിച്ചറിയാൻ കഴിയും. എന്നാൽ ഇവ രണ്ടും ഒരേ സെൻസറിൽ കൊണ്ടുവരിക എന്നത് ശാസ്ത്രലോകത്തിന് മുന്നിലെ വലിയൊരു വെല്ലുവിളിയായിരുന്നു. ഈ പ്രതിസന്ധി മറികടക്കാൻ ഗവേഷകർ മാതൃകയാക്കിയത് നമ്മുടെ കണ്ണുകളെയാണ്. പ്രകാശത്തിനനുസരിച്ച് കണ്ണിന്റെ പാപ്പകൾ വികസിക്കുകയും ചുരുങ്ങുകയും ചെയ്യുന്നത് പോലെ, ഈ സെൻസറിലെ ഇലക്ട്രിക്കൽ ഫീൽഡിനെ ആവശ്യാനുസരണം മാറ്റാൻ കഴിയും എന്നതാണ് ഇതിന്റെ പ്രത്യേകത.
ഒരു വസ്തു ദൂരെയുള്ളപ്പോൾ സെൻസർ അതിന്റെ നിരീക്ഷണ വ്യാപ്തി വർദ്ധിപ്പിക്കുകയും, ആ വസ്തുവിനെ തൊട്ടു കഴിഞ്ഞാൽ ഉടൻ തന്നെ അതിന്റെ ശ്രദ്ധ സ്പർശനത്തിലേക്ക് മാറ്റുകയും ചെയ്യുന്നു. മുൻപത്തെക്കാൾ നൂറ് ശതമാനത്തിലധികം കൃത്യതയോടെ വസ്തുക്കളെ തിരിച്ചറിയാൻ ഈ ‘ബുദ്ധിമാനായ’ സെൻസറിന് സാധിക്കും. 90 മില്ലിമീറ്റർ ദൂരെയുള്ള മനുഷ്യന്റെ സാന്നിധ്യം പോലും തിരിച്ചറിഞ്ഞ്, അപകടങ്ങൾ ഒഴിവാക്കാൻ ഈ സെൻസർ ഘടിപ്പിച്ച റോബോട്ടുകൾക്ക് കഴിയും.
കേവലം അപകടങ്ങൾ ഒഴിവാക്കുക മാത്രമല്ല, അതീവ ലോലമായ വസ്തുക്കൾ കൈകാര്യം ചെയ്യാനും ഇതിലൂടെ സാധിക്കും. ഒരു കോഴിമുട്ട പൊട്ടാതെ പിടിക്കാനോ, നേർത്ത സ്പർശനം തിരിച്ചറിയാനോ ഉള്ള കഴിവ് റോബോട്ടുകൾക്ക് ലഭിക്കുന്നതോടെ ഫാക്ടറികളിലും ആശുപത്രികളിലും മനുഷ്യർക്കൊപ്പം തോളോട് തോൾ ചേർന്ന് പ്രവർത്തിക്കാൻ ഇവ സജ്ജമാകും. വ്യാവസായിക മേഖലയിലെ തടസ്സങ്ങളെ അതിജീവിച്ച് ഈ സാങ്കേതികവിദ്യ പുറത്തിറങ്ങുന്നതോടെ റോബോട്ടുകൾ വെറും യന്ത്രങ്ങളല്ല, മറിച്ച് നമ്മുടെ വികാരങ്ങൾ കൂടി തിരിച്ചറിയുന്ന കൂട്ടാളികളായി മാറും.
About The Author
