സോഫ്റ്റ്വെയർ ഡെവലപ്മെന്റ് രംഗത്ത് വലിയ മാറ്റങ്ങൾക്ക് വഴിയൊരുക്കി ഗൂഗിൾ പുതിയ ആർട്ടിഫിഷ്യൽ ഇന്റലിജൻസ് പ്ലാറ്റ്ഫോമായ ‘ആന്റിഗ്രാവിറ്റി’ (Antigravity) അവതരിപ്പിച്ചു. നിർദ്ദേശങ്ങൾക്കനുസരിച്ച് കോഡുകൾ എഴുതി നൽകുന്ന സാധാരണ ചാറ്റ്ബോട്ടുകളിൽ നിന്ന് വ്യത്യസ്തമായി, കോഡിംഗ് ജോലികൾ സ്വയം ആസൂത്രണം ചെയ്യാനും നടപ്പിലാക്കാനും സാധിക്കുന്ന അഡ്വാൻസ്ഡ് എഐ ഏജന്റുകളാണ് ഇതിന്റെ സവിശേഷത.
ഗൂഗിളിന്റെ ഏറ്റവും പുതിയ ജെമിനി 3 (Gemini 3) മോഡലിന്റെ കരുത്തിലാണ് ആന്റിഗ്രാവിറ്റി പ്രവർത്തിക്കുന്നത്. ഒരു ‘സഹപ്രവർത്തകനെപ്പോലെ’ (Co-worker) ഡെവലപ്പർമാർക്കൊപ്പം പ്രവർത്തിക്കാൻ ഇതിന് സാധിക്കുമെന്ന് ഗൂഗിൾ അവകാശപ്പെടുന്നു. കോഡ് എഡിറ്റർ, ടെർമിനൽ, വെബ് ബ്രൗസർ എന്നിവയിലേക്ക് നേരിട്ട് പ്രവേശനം സാധ്യമാകുന്ന ഈ സംവിധാനത്തിന്, സങ്കീർണ്ണമായ പ്രോജക്റ്റുകൾ ഏറ്റെടുത്ത് നടത്താൻ ശേഷിയുണ്ട്. ഉദാഹരണത്തിന്, ഒരു വെബ് ആപ്ലിക്കേഷൻ നിർമ്മിക്കാൻ ആവശ്യപ്പെട്ടാൽ, കോഡ് ജനറേറ്റ് ചെയ്യുന്നത് മുതൽ ടെസ്റ്റുകൾ നടത്താനും, ബഗുകൾ (Bugs) കണ്ടെത്തി പരിഹരിക്കാനും, ഔട്ട്പുട്ട് പരിശോധിക്കാനും ആന്റിഗ്രാവിറ്റിക്ക് സാധിക്കും.
ഒരു ഉദാഹരണം പറഞ്ഞാൽ, ഒരു വെബ്സൈറ്റ് ഉണ്ടാക്കണമെന്ന് നിങ്ങൾ ഇതിനോട് പറഞ്ഞാൽ, അതിന് വേണ്ട കോഡുകൾ എഴുതാനും, അതിൽ വരാൻ സാധ്യതയുള്ള തെറ്റുകൾ സ്വയം കണ്ടുപിടിച്ച് തിരുത്താനും, അത് ശരിയായി പ്രവർത്തിക്കുന്നുണ്ടോ എന്ന് പരിശോധിക്കാനും ഇതിന് കഴിവുണ്ട്. അതായത്, ഒരാൾ ചെയ്യേണ്ട ജോലികൾ സ്വയം ആസൂത്രണം ചെയ്ത് നടപ്പിലാക്കാൻ ഈ എഐയ്ക്ക് സാധിക്കും.
പ്രധാന ഗുണങ്ങൾ
എഐ എന്തൊക്കെയാണ് ചെയ്യുന്നതെന്ന് നമുക്ക് കൃത്യമായി കാണിച്ചുതരും. സ്ക്രീൻഷോട്ടുകളും പ്ലാനുകളും ഒക്കെ അത് തന്നെ തയ്യാറാക്കി നൽകും. വലിയ ജോലികൾക്കായി ഒരേസമയം ഒന്നിലധികം എഐ ഏജന്റുകളെക്കൊണ്ട് ജോലി ചെയ്യിപ്പിക്കാനും സാധിക്കും. വിൻഡോസ്, മാക് കമ്പ്യൂട്ടറുകളിൽ ഇത് ഇപ്പോൾ സൗജന്യമായി പരീക്ഷിച്ച് നോക്കാം.
ആവർത്തന സ്വഭാവമുള്ള കോഡിംഗ്, ടെസ്റ്റിംഗ് ജോലികൾ എഐ ഏറ്റെടുക്കുന്നത് ഐടി മേഖലയിലെ ജൂനിയർ ഡെവലപ്പർമാരുടെ തൊഴിലവസരങ്ങളെ ബാധിക്കുമോ എന്ന ആശങ്കയും ഇതോടൊപ്പം ഉയരുന്നുണ്ട്. എന്നാൽ, എഐ സംവിധാനങ്ങൾക്കും തെറ്റുകൾ സംഭവിക്കാൻ സാധ്യതയുള്ളതിനാൽ മനുഷ്യരുടെ മേൽനോട്ടം അനിവാര്യമാണ്. അതിനാൽ, ജൂനിയർ ഡെവലപ്പർമാരുടെ റോൾ കോഡ് എഴുതുന്നതിൽ നിന്ന് മാറി, എഐ ടൂളുകളെ നിയന്ത്രിക്കുന്നതിലേക്കും സിസ്റ്റം ആർക്കിടെക്ചർ പഠിക്കുന്നതിലേക്കും മാറുമെന്നാണ് സാങ്കേതിക വിദഗ്ദ്ധരുടെ വിലയിരുത്തൽ.
About The Author
