ഉപയോക്താക്കള്‍ക്ക് പ്രയോജനകരമാകുന്ന നിരവധി സവിശേഷതകളുമായാണ് വാട്സ്ആപ്പ് 2020ല്‍ തിളങ്ങിയത്. വാട്സ്ആപ്പിന്‍റെ പേയ്മെന്റ് രംഗത്തെയ്ക്കുള്ള ചുവടുവയ്പ്പിന് കൂടി 2020 സാക്ഷിയായിരിക്കുകയാണ്. ഈ കഴിഞ്ഞനാളുകളില്‍ ഫെയ്സ്ബുക്കിന്‍റെ കീഴിലുള്ള ഈ മെസ്സേജ്ജിംഗ് ആപ്ലിക്കേഷനില്‍ ഉണ്ടായിട്ടുള്ള പ്രധാന അപ്ഡേഷനുകള്‍ നമുക്ക് ഒന്നുനോക്കാം.
- വാട്സ്ആപ്പ് പേയ്‌മെന്‍റ്സ്: നാഷണൽ പേയ്മെന്റ് കോർപ്പറേഷൻ ഓഫ് ഇന്ത്യ (എൻ‌പി‌സി‌ഐ)യുടെ അംഗീകാരത്തോട് കൂടി യൂണിഫൈഡ് പേയ്മെന്റ് ഇന്‍റർഫേസ് (യുപിഐ) സവിശേഷതയില്‍ പ്രവര്‍ത്തിക്കുന്ന തത്സമയ പേയ്മെന്റ് സംവിധാനമാണ് വാട്സ്ആപ്പ് പേയ്മെന്റ്. ഉപയോക്താക്കള്‍ക്ക് ഇടപാടുകൾ പ്രാപ്തമാക്കുന്നതിന് 160 ബാങ്കുകളുടെ പിന്തുണയോട് കൂടിയാണിത് പ്രവര്‍ത്തിക്കുന്നത്. ഈ പുതിയ സവിശേഷത ഉപയോഗിച്ച്, ഒരു സന്ദേശം അയയ്‌ക്കുന്നതുപോലെ വളരെ എളുപ്പമായിതന്നെ പേയ്‌മെന്‍റുകൾ നടത്തുവാനുള്ള അവസരമാണ് വാട്സ്ആപ്പ് നല്‍കുന്നത്.
- അപ്രത്യക്ഷമാകുന്ന സന്ദേശങ്ങൾ: പേര് സൂചിപ്പിക്കുന്നത് പോലെ ഈ സവിശേഷത 7 ദിവസത്തിനുശേഷം അപ്രത്യക്ഷമാകുന്ന രീതിയില്‍ ഒരു ചാറ്റിലേക്ക് സന്ദേശങ്ങൾ അയയ്ക്കാൻ ഉപയോക്താക്കളെ അനുവദിക്കുന്നു. ഇത് ചാറ്റുകളിലെ അനാവശ്യ സന്ദേശങ്ങള്‍ ഒഴിവാക്കുകയും സംഭാഷണങ്ങള്‍ കൂടുതൽ സ്വകാര്യമായി സൂക്ഷിക്കാൻ സഹായിക്കുകയും ചെയ്യുന്നുവെന്ന് സന്ദേശമയയ്ക്കൽ പ്ലാറ്റ്ഫോം അവകാശപ്പെടുന്നു.
- റീഡിസൈന്‍ഡ് സ്റ്റോറേജ് മാനേജ്മെന്‍റ് ടൂള്‍: ഈ വർഷം ആദ്യം ആരംഭിച്ച പുതിയ സ്റ്റോറേജ് മാനേജ്മെന്‍റ് ടൂളാണിത്. ഉപയോക്താക്കൾക്ക് അവരുടെ വാട്സ്ആപ്പ് ചാറ്റുകളിലെ ഫോർ‌വേർ‌ഡ് ചെയ്‌ത ടെക്സ്റ്റുകൾ, ചിത്രങ്ങൾ, വീഡിയോകൾ എന്നിവ ഈ ടൂള്‍ ഉപയോഗിച്ച് എളുപ്പത്തില്‍ ഡിലീറ്റ് ചെയ്യുവാന്‍ സാധിക്കുന്നതാണ്.
- ഓള്‍വെയ്സ് മ്യൂട്ട്: ഉപയോക്താക്കൾക്ക് അവരുടെ വാട്സ്ആപ്പ് ഗ്രൂപ്പുകളെയോ വ്യക്തിഗത ചാറ്റുകളെയോ ‘എല്ലായ്പ്പോഴും നിശബ്ദമാക്കുക’ (ALWAYS MUTE) ഓപ്ഷൻ ഉപയോഗിച്ച് അനിശ്ചിതമായി നിശബ്ദമാക്കാൻ കഴിയും.
- കസ്റ്റമൈസബിള്‍ വാൾപേപ്പറുകള്‍: വാട്സ്ആപ്പ് ഉപയോക്താക്കള്‍ക്ക് അവരുടെ പ്രധാനപ്പെട്ട ചാറ്റുകൾക്കും പ്രിയപ്പെട്ട ആളുകളുടെ ചാറ്റുകള്‍ക്കുമായി ഒരു കസ്റ്റമൈസബിള്‍ വാൾപേപ്പർ ഉപയോഗിക്കാവുന്നതാണ്. ഇത് അവരുടെ ചാറ്റുകൾ കൂടുതൽ വ്യക്തിഗതവും വ്യത്യസ്തവുമാക്കാൻ അനുവദിക്കുന്നു.
- അഡ്വാന്‍സ്ഡ് സേര്‍ച്ച് ഓപ്ഷൻ: ഈ ഓപ്ഷൻ ഉപയോഗിച്ച്, ഉപയോക്താക്കൾക്ക് ഇപ്പോൾ ഡോക്യുമെന്‍റുകൾക്കും ലിങ്കുകൾക്കുമൊപ്പം ഫോട്ടോകൾ, ഓഡിയോ, ജിഐഫുകൾ, വീഡിയോകൾ എന്നിവ ഉപയോഗിച്ച് സേര്‍ച്ച് ഫിൽട്ടർ ചെയ്യാൻ കഴിയും.
- ആനിമേറ്റഡ് സ്റ്റിക്കറുകൾ: വികാരങ്ങൾ പ്രകടിപ്പിക്കാൻ വാട്സ്ആപ്പിലെ സ്റ്റിക്കറുകൾ ഉപയോഗിക്കുന്നു. ആശയവിനിമയം നടത്താനുള്ള കൂടുതൽ രസകരവും ആവിഷ്‌കൃതവുമായ മാർഗ്ഗമായി വാട്സ്ആപ്പ് ആനിമേറ്റഡ് സ്റ്റിക്കർ പായ്ക്കുകൾ പുറത്തിറക്കിയിരിക്കുന്നു.
- ക്യുആർ കോഡുകൾ: വാട്സ്ആപ്പില് ഒരു പുതിയ കോൺടാക്റ്റ് ചേർക്കുന്നതിനുള്ള ഒരു എളുപ്പമാർഗ്ഗമായാണ് ഈ ഫീച്ചര്‍ അവതരിപ്പിച്ചിരിക്കുന്നത്. നിങ്ങളുടെ കോൺ‌ടാക്റ്റുകളിൽ പുതിയ നമ്പര്‍ ചേർ‌ക്കുന്നതിന് ഉപയോക്താക്കൾക്ക് അവരുടെ QR കോഡ് സ്കാൻ ചെയ്യാൻ കഴിയും.
- ഗ്രൂപ്പ് വീഡിയോ കോളുകൾ: വാട്സ്ആപ്പ് ഉപയോക്താക്കൾക്ക് ഇപ്പോള്‍ ഒരേസമയം 8 പേര്‍വരെ പങ്കെടുത്തുകൊണ്ടുള്ള വീഡിയോ കോൾ ചെയ്യാൻ കഴിയും. പങ്കെടുക്കുന്നയാളുടെ വീഡിയോ പരമാവധി ഫുള്‍ സ്‌ക്രീനിലേക്ക് ആക്കുവാന്‍ വാട്സ്ആപ്പില് സാധിക്കുന്നതാണ്.
- ഡാർക്ക് മോഡ്: ഡാർക്ക് മോഡ് തീം ഇപ്പോൾ കംപ്യൂട്ടർ / ഡെസ്ക്ടോപ്പ് എന്നിവയില്‍ ലഭ്യമാണ്. അതായത്, വാട്സ്ആപ്പ് വെബ് ഉപയോഗിക്കുമ്പോള്‍ ഈ സവിശേഷത ഉപയോഗപ്പെടുത്താന്‍ സാധിക്കും. സ്ക്രീനില്‍ അധികനേരം നോക്കിയിരിക്കുമ്പോള്‍ ഉണ്ടാകുന്ന കണ്ണിലെ സമ്മർദ്ദം ലഘൂകരിക്കാനാണ് പുതിയ ഡാർക്ക് തീം ലക്ഷ്യമിടുന്നത്.
About The Author
Leave a Reply