ഗൂഗിൾ സെർച്ച് ബോക്സിന്റെ റീഡിസൈൻ, ജെമിനി 3.5 ഫ്ലാഷ്, പേഴ്സണൽ ഇന്റലിജൻസ് ഫീച്ചറുകൾ, മിനി ആപ്പുകളും ഡാഷ്ബോർഡുകളും നിർമ്മിക്കാനുള്ള ഏജന്റിക് ടൂളുകൾ എന്നിവ ഉൾപ്പെടുത്തി ഗൂഗിൾ തങ്ങളുടെ സെർച്ച് സംവിധാനം പൂർണ്ണമായി പരിഷ്കരിച്ചിരിക്കുകയാണ്. ഇതിന്റെ ഭാഗമായി ഗൂഗിൾ ഐ/ഒ 2026 (Google I/O 2026) കോൺഫറൻസിൽ പ്രഖ്യാപിച്ച ‘ഇൻഫർമേഷൻ ഏജന്റുകൾ’ എന്ന പുത്തൻ ഫീച്ചർ ഉപയോക്താക്കൾക്കായി ഗൂഗിൾ റോൾ ഔട്ട് ചെയ്തു തുടങ്ങി. വെബ്സൈറ്റുകൾ നിരന്തരം നിരീക്ഷിക്കാനും വിവരങ്ങളിൽ മാറ്റം വരുമ്പോൾ ഉപയോക്താക്കൾക്ക് തത്സമയം അപ്ഡേറ്റുകൾ നൽകാനും ഈ എഐ സെർച്ച് ഏജന്റുകൾക്ക് സാധിക്കും.
ലളിതമായ ഒറ്റ ഉത്തരത്തിൽ അവസാനിക്കാത്ത സെർച്ചുകൾക്കായാണ് ‘ഇൻഫർമേഷൻ ഏജന്റുകൾ’ രൂപകൽപ്പന ചെയ്തിരിക്കുന്നത്. ഒരേ കാര്യം വീണ്ടും വീണ്ടും സെർച്ച് ചെയ്ത് നോക്കുന്നതിന് പകരം, പശ്ചാത്തലത്തിൽ ആ വിഷയം നിരന്തരം ട്രാക്ക് ചെയ്യാൻ ഉപയോക്താക്കൾക്ക് ഇനി ഗൂഗിളിനോട് ആവശ്യപ്പെടാം.
എഐ സെർച്ച് ഏജന്റുകൾ പ്രവർത്തിക്കുന്നത് എങ്ങനെ?
ഗൂഗിൾ സെർച്ചിലെ ‘എഐ മോഡിനുള്ളിലാണ്’ ഈ ഇൻഫർമേഷൻ ഏജന്റുകൾ പ്രവർത്തിക്കുന്നത്. ഏതെങ്കിലും ഒരു പ്രത്യേക വിഷയം, ഉൽപ്പന്നം, ഇവന്റ്, വിലവിവരങ്ങൾ, സ്പോർട്സ് സ്കോറുകൾ അല്ലെങ്കിൽ പുതിയ സംഭവവികാസങ്ങൾ എന്നിവ ഫോളോ ചെയ്യാൻ ഉപയോക്താവിന് സാധാരണ ഭാഷയിൽ പ്രോംപ്റ്റ് നൽകാം. തുടർന്ന് ഈ എഐ ഏജന്റ് വെബ്സൈറ്റുകൾ, സാമ്പത്തിക ഡാറ്റകൾ, സ്പോർട്സ് സ്കോറുകൾ, സോഷ്യൽ മീഡിയ പോസ്റ്റുകൾ എന്നിവ നിരന്തരം സ്കാൻ ചെയ്തുകൊണ്ടിരിക്കും.
ഉദാഹരണത്തിന്, വിമാന ടിക്കറ്റ് നിരക്കുകൾ ട്രാക്ക് ചെയ്യാനോ, ഏതെങ്കിലും പുതിയ ഉൽപ്പന്നത്തിന്റെ ലോഞ്ച് നിരീക്ഷിക്കാനോ, നിർദ്ദിഷ്ട ജോബ് വേക്കൻസികൾ കണ്ടെത്താനോ, റിയൽ എസ്റ്റേറ്റ് ലിസ്റ്റിംഗുകൾ ശ്രദ്ധിക്കാനോ ഉപയോക്താക്കൾക്ക് ഈ ഏജന്റിനെ ചുമതലപ്പെടുത്താം. ട്രാക്ക് ചെയ്യുന്ന വിവരങ്ങളിൽ എന്തെങ്കിലും മാറ്റമുണ്ടായാൽ ഉടൻ തന്നെ ഗൂഗിൾ ആപ്പ് വഴി നോട്ടിഫിക്കേഷൻ ലഭിക്കും.
കീവേഡുകൾ മാത്രം അടിസ്ഥാനമാക്കി പ്രവർത്തിക്കുന്ന പരമ്പരാഗത അലേർട്ടുകളേക്കാൾ വളരെ ഫ്ലെക്സിബിൾ ആണ് ഈ ഫീച്ചർ. സ്വാഭാവിക ഭാഷയിൽ പ്രോംപ്റ്റുകൾ എഴുതാമെന്നതാണ് ഇതിന്റെ പ്രധാന സവിശേഷത. പുതിയ വിവരങ്ങൾ ലഭ്യമാകുമ്പോൾ, എന്തൊക്കെ മാറ്റങ്ങളാണ് വന്നിട്ടുള്ളത് എന്നതിന്റെ ഒരു ലഘുരൂപവും അതോടൊപ്പം ഉറവിടങ്ങൾ പരിശോധിക്കാനുള്ള ലിങ്കുകളും ഗൂഗിൾ ഉപയോക്താവിന് നൽകും.
ആർക്കൊക്കെ ലഭ്യമാകും, എങ്ങനെ ഉപയോഗിക്കാം?
ഗൂഗിൾ ഐ/ഒ 2026-ൽ അറിയിച്ചത് പ്രകാരം ഗൂഗിൾ എഐ പ്രോ, എഐ അൾട്രാ വരിക്കാർക്കാണ് ഈ ഫീച്ചർ ആദ്യ ഘട്ടത്തിൽ ലഭിക്കുക. പ്രതിമാസം 99.99 ഡോളർ നിരക്കിലുള്ള എഐ അൾട്രാ പ്ലാൻ ഉപയോഗിക്കുന്നവർക്കാണ് നിലവിൽ എഐ മോഡിൽ ഈ ഫീച്ചർ ലഭ്യമായിത്തുടങ്ങിയിരിക്കുന്നത്.
ഇത് ഉപയോഗിക്കുന്നതിനായി ഗൂഗിൾ സെർച്ചിലെ ‘AI Mode’ തുറന്ന്, ഏതെങ്കിലും വിഷയം നിരീക്ഷിക്കാൻ ആവശ്യപ്പെടുകയേ വേണ്ടൂ. പ്രോംപ്റ്റ് വിൻഡോയിൽ “keep me updated on” അല്ലെങ്കിൽ “alert me when” തുടങ്ങിയ പ്രയോഗങ്ങൾ നടത്തിക്കൊണ്ട് ഈ ഫീച്ചർ ആക്ടിവേറ്റ് ചെയ്യാം. ഇങ്ങനെ ക്രിയേറ്റ് ചെയ്യുന്ന ഏജന്റുകളെ എഐ മോഡ് ഹിസ്റ്ററിയിൽ പോയി നിയന്ത്രിക്കാനും ആവശ്യമെങ്കിൽ ട്രാക്കിംഗ് നിർത്താനും സാധിക്കും. ഈ പുത്തൻ സംവിധാനം ദൈനംദിന സെർച്ചുകളെ എങ്ങനെ മാറ്റിമറിക്കുമെന്ന് വരും ദിവസങ്ങളിലെ വിപുലമായ ഉപയോഗത്തിലൂടെ വ്യക്തമാകും.
About The Author
