ബഹിരാകാശ ദൗത്യങ്ങളിൽ മനുഷ്യന് പകരക്കാരനായി ഹ്യൂമനോയിഡ് റോബോട്ടുകളെ എത്തിക്കാനുള്ള ചൈനയുടെ സ്വപ്നം യാഥാർത്ഥ്യത്തിലേക്ക്. ചൈനീസ് ടെക് കമ്പനിയായ എഞ്ചിൻ എഐ (EngineAI) വികസിപ്പിച്ച PM01 എന്ന റോബോട്ട് ഉടൻ ബഹിരാകാശത്തേക്ക് പറക്കും. പ്രമുഖ സ്വകാര്യ ബഹിരാകാശ യാത്രാ കമ്പനിയായ ബീജിംഗ് ഇന്റർസ്റ്റെല്ലാറുമായി ചേർന്നാണ് എഞ്ചിൻ എഐ ഈ ചരിത്ര ദൗത്യത്തിന് തുടക്കമിടുന്നത്.
ഭൂമിയിൽ നിന്ന് വ്യത്യസ്തമായി ബഹിരാകാശത്തെ അതികഠിനമായ സാഹചര്യങ്ങളെ അതിജീവിക്കാൻ പ്രത്യേകമായി രൂപകൽപ്പന ചെയ്തതാണ് PM01. കേവലം 40 കിലോ ഭാരവും 1.38 മീറ്റർ ഉയരവുമുള്ള ഈ റോബോട്ടിന് മനുഷ്യനെപ്പോലെ ചലിക്കാനും സങ്കീർണ്ണമായ ജോലികൾ ചെയ്യാനും സാധിക്കും. 320 ഡിഗ്രി വരെ തിരിയാൻ കഴിയുന്ന അരക്കെട്ടും മികച്ച കൃത്രിമ ബുദ്ധി സംവിധാനവുമാണ് ഇതിന്റെ പ്രധാന പ്രത്യേകത. ബഹിരാകാശ നിലയങ്ങളിലെ അറ്റകുറ്റപ്പണികൾക്കും മനുഷ്യർക്ക് കടന്നുചെല്ലാൻ ബുദ്ധിമുട്ടുള്ള അപകടകരമായ മേഖലകളിലെ പര്യവേക്ഷണത്തിനും ഈ റോബോട്ട് നേതൃത്വം നൽകും.
നേരത്തെ ഈ റോബോട്ടിന്റെ പരിമിതമായ പതിപ്പുകൾ വാണിജ്യാടിസ്ഥാനത്തിൽ വിപണിയിൽ ഇറക്കി എഞ്ചിൻ എഐ ശ്രദ്ധ നേടിയിരുന്നു. എങ്കിലും റോബോട്ടുകളുടെ സുരക്ഷയും പ്രായോഗികതയും സംബന്ധിച്ച് വലിയ ചർച്ചകൾ ടെക് ലോകത്ത് നടക്കുന്നുണ്ട്. ഇത്തരം ആശങ്കകൾക്കിടയിലും ബഹിരാകാശ രംഗത്ത് മനുഷ്യന്റെ അധ്വാനവും അപകടസാധ്യതകളും കുറയ്ക്കാൻ PM01 പോലുള്ള റോബോട്ടുകൾക്ക് കഴിയുമെന്നാണ് ശാസ്ത്രലോകം വിലയിരുത്തുന്നത്.
About The Author
