സാങ്കേതികവിദ്യ വളരുന്നതിനൊപ്പം തന്നെ IT കമ്പനികൾ പുറത്തുവിടുന്ന പുതിയ വാക്കുകളും (Buzzwords) നമ്മളെ വട്ടംചുറ്റിക്കാറുണ്ട്. എഞ്ചിനീയർമാരും മാർക്കറ്റിംഗ് വിദഗ്ധരും ചേർന്ന് സൃഷ്ടിക്കുന്ന പദങ്ങൾ നിങ്ങളെ വട്ടം ചുറ്റിക്കാറുണ്ടോ? ഈ പദങ്ങൾ ഒക്കെ ഒന്ന് മനസ്സിൽ വച്ചോളൂ
1. എഐ ഫാക്ടറി (AI Factory)
എൻവിഡിയ (Nvidia), ഡെൽ (Dell) തുടങ്ങിയ കമ്പനികൾ അവരുടെ പുതിയ ഡാറ്റാ സെന്ററുകളെ വിളിക്കുന്ന പേരാണിത്. ആർട്ടിഫിഷ്യൽ ഇന്റലിജൻസിന് ആവശ്യമായ ഭീമമായ പവറും സ്റ്റോറേജും ഇവിടെയുണ്ട്. എന്നാൽ ലളിതമായി പറഞ്ഞാൽ, പുതിയ കാലത്തെ ആവശ്യങ്ങൾക്കനുസരിച്ച് മാറ്റം വരുത്തിയ ഒരു ‘ഡാറ്റാ സെന്റർ’ (Data Center) മാത്രമാണിത്.
2. എ.ജി.ഐ. (AGI – Artificial General Intelligence)
മനുഷ്യന്റെ ബുദ്ധിശക്തിക്ക് സമാനമായി ചിന്തിക്കാനും പ്രവർത്തിക്കാനും കഴിയുന്ന സാങ്കേതികവിദ്യയെയാണ് എ.ജി.ഐ എന്ന് വിളിക്കുന്നത്. കാലങ്ങളായി നമ്മൾ ‘ആർട്ടിഫിഷ്യൽ ഇന്റലിജൻസ്’ എന്ന് വിളിച്ചിരുന്നതിന്റെ കൂടുതൽ വികസിതമായ രൂപമാണിതെന്ന് കമ്പനികൾ അവകാശപ്പെടുന്നു.
3. സൂപ്പർ ഇന്റലിജൻസ് (Superintelligence)
എ.ജി.ഐക്കും അപ്പുറമുള്ള ഘട്ടമാണിത്. നമ്മൾ കാണുന്നതും കേൾക്കുന്നതുമായ എല്ലാ കാര്യങ്ങളെക്കുറിച്ചും തത്സമയം കൃത്യമായ വിവരങ്ങൾ നൽകാൻ കഴിയുന്നത്ര കരുത്തുള്ള എഐ ആണിത്. മെറ്റാ സിഇഒ മാർക്ക് സക്കർബർഗ് ഇതിനെക്കുറിച്ച് വലിയ പ്രവചനങ്ങൾ നടത്തുന്നുണ്ടെങ്കിലും, ഒരു സാധാരണ സ്റ്റീക്ക് സോസ് എങ്ങനെ ഉണ്ടാക്കാം എന്ന ചോദ്യത്തിന് മുന്നിൽ പോലും നിലവിലെ എഐ പതറുന്നതാണ് യാഥാർത്ഥ്യം.
4. മൾട്ടിമോഡൽ (Multimodal)
ഒരേസമയം ടെക്സ്റ്റ്, ഓഡിയോ, വീഡിയോ, ചിത്രങ്ങൾ എന്നിവ കൈകാര്യം ചെയ്യാൻ കഴിയുന്ന സാങ്കേതികവിദ്യയാണിത്. ഉദാഹരണത്തിന്, ഒരു ഫോട്ടോ കാണിച്ചാൽ അതിനെക്കുറിച്ച് വിവരിക്കാനോ ഒരു വോയിസ് ക്ലിപ്പിന് മറുപടി നൽകാനോ ഈ സംവിധാനത്തിന് കഴിയും.
5. ആക്സിലറേറ്റഡ് ചിപ്പുകൾ: NPU & TPU
NPU (Neural Processing Unit): ലാപ്ടോപ്പുകളിലും മറ്റും എഐ പ്രവർത്തനങ്ങൾ വേഗത്തിലാക്കാൻ ഉപയോഗിക്കുന്ന ചിപ്പ്.
TPU (Tensor Processing Unit): ഗൂഗിൾ അവരുടെ ഡാറ്റാ സെന്ററുകളിൽ എഐ സോഫ്റ്റ്വെയറുകൾ പ്രവർത്തിപ്പിക്കാൻ ഉപയോഗിക്കുന്ന പ്രത്യേക ചിപ്പുകൾ. ഇവ രണ്ടും പഴയ പ്രോസസ്സറുകളേക്കാൾ വേഗതയും ഊർജ്ജക്ഷമതയും ഉള്ളവയാണ്.
6. റാഗ് (RAG – Retrieval-Augmented Generation)
ചാറ്റ്ബോട്ടുകൾ നൽകുന്ന മറുപടികളിലെ തെറ്റുകൾ തിരുത്താൻ സഹായിക്കുന്ന വിദ്യയാണിത്. വിശ്വസനീയമായ പുറം സ്രോതസ്സുകളിൽ (ഉദാഹരണത്തിന് എൻസൈക്ലോപീഡിയകൾ) നിന്ന് വിവരങ്ങൾ ശേഖരിച്ച് കൂടുതൽ കൃത്യമായ മറുപടി നൽകാൻ ഇത് എഐയെ സഹായിക്കുന്നു.
7. ഏജന്റിക് (Agentic)
നിങ്ങൾക്ക് വേണ്ടി കാര്യങ്ങൾ ചെയ്തുതരുന്ന എഐയെയാണ് ഇങ്ങനെ വിളിക്കുന്നത്. ഉദാഹരണത്തിന്, നിങ്ങൾക്ക് വേണ്ടി ഒരു വിമാന ടിക്കറ്റ് ബുക്ക് ചെയ്യുന്ന എഐ. പണ്ട് നമ്മൾ വിളിച്ചിരുന്ന ‘വെർച്വൽ അസിസ്റ്റന്റ്’ (Virtual Assistant) എന്നതിന്റെ പുതിയ പേരാണിത്.
8. വൈബ്കോഡിംഗ് (Vibecoding)
പ്രോഗ്രാമിംഗ് അറിയാത്തവർ പോലും എഐയുടെ സഹായത്തോടെ കോഡിംഗ് ചെയ്യുന്ന രീതിയാണിത്. “എന്റെ ക്ലോസറ്റിലെ വസ്ത്രങ്ങൾ തിരഞ്ഞെടുക്കാൻ ഒരു ആപ്പ് വേണം” എന്ന് ടൈപ്പ് ചെയ്താൽ എഐ നിങ്ങൾക്കായി കോഡ് നിർമ്മിച്ചു നൽകും. ഇതിനെയാണ് കൗതുകകരമായി ‘വൈബ്കോഡിംഗ്’ എന്ന് വിളിക്കുന്നത്.
9 പ്രോംപ്റ്റ് എഞ്ചിനീയറിംഗ് (Prompt Engineering)
എഐയോട് എങ്ങനെ കൃത്യമായി സംസാരിക്കണം എന്ന കലയാണിത്. നമുക്ക് ആവശ്യമുള്ള കാര്യം കൃത്യമായി ലഭിക്കാൻ എഐക്ക് നൽകുന്ന നിർദ്ദേശങ്ങളെ ‘പ്രോംപ്റ്റ്’ എന്ന് വിളിക്കുന്നു. ഒരു മികച്ച റിസൾട്ട് കിട്ടാനായി ചോദ്യങ്ങൾ ശരിയായി ചോദിക്കുന്നതിനെയാണ് ഈ ഗമയുള്ള പേര് കൊണ്ട് ഉദ്ദേശിക്കുന്നത്
10. ഡീപ് ഫേക്ക് (Deepfake)
ഒരാളുടെ മുഖമോ ശബ്ദമോ എഐ ഉപയോഗിച്ച് മാറ്റി മറ്റൊരാളുടേതാക്കി മാറ്റുന്ന സാങ്കേതികവിദ്യയാണിത്. ഇത് പലപ്പോഴും വ്യാജ വീഡിയോകൾ നിർമ്മിക്കാനാണ് ഉപയോഗിക്കുന്നത് എന്നതിനാൽ വലിയ സുരക്ഷാ ഭീഷണിയായി ഇതിനെ കണക്കാക്കുന്നു.
11. പാരാമീറ്ററുകൾ (Parameters) ഒരു എഐ മോഡൽ എത്രത്തോളം വലുതാണെന്ന് അളക്കുന്നത് ഈ പാരാമീറ്ററുകളുടെ എണ്ണം നോക്കിയാണ്. ഒരു വിദ്യാർത്ഥിയുടെ തലച്ചോറിലെ ഓർമ്മശക്തി പോലെ ഇതിനെ കരുതാം. പാരാമീറ്ററുകൾ കൂടുന്തോറും എഐ കൂടുതൽ സങ്കീർണ്ണമായ കാര്യങ്ങൾ മനസ്സിലാക്കാൻ പ്രാപ്തമാകുന്നു.
12. ടോക്കണുകൾ (Tokens)
എഐ നമ്മൾ നൽകുന്ന വരികളെ ഓരോ കഷ്ണങ്ങളായി തിരിച്ചാണ് വായിക്കുന്നത്. ഈ ഓരോ കഷ്ണത്തെയും ‘ടോക്കൺ’ എന്ന് വിളിക്കുന്നു. നമ്മൾ എഐ ഉപയോഗിക്കുമ്പോൾ വരുന്നത് എത്ര വാക്കുകൾ എന്നതിനേക്കാൾ എത്ര ടോക്കണുകൾ ചിലവായി എന്നാണ് കമ്പനികൾ കണക്കാക്കുന്നത്
About The Author
