ജര്‍മ്മന്‍ കമ്പനിയായ ലൈക ആഗോളതലത്തിൽ ലൈക ക്യു2 മോണോക്രോം എന്ന പുതിയ ക്യാമറ അവതരിപ്പിച്ചിരിക്കുകയാണ്. കമ്പനിയുടെ ക്യു ലൈൻ ക്യാമറകളിലെ ഏറ്റവും പുതിയ അംഗമാണ് ക്യു2 മോണോക്രോം. 2019 മാർച്ചിൽ ലൈക ക്യു2 ഫുൾ ഫ്രെയിം ക്യാമറ കമ്പനി പുറത്തിറക്കിയിരുന്നു.
ലൈക ക്യു2 ന് സമാനമായി, അതിന്‍റെ മോണോക്രോം പതിപ്പിൽ ഒരു ഫിക്സഡ് ലെൻസ് സിസ്റ്റം സവിശേഷതയുണ്ട്, അതോടൊപ്പം ഇതില്‍ ബ്ലാക്ക് ആന്‍ഡ് വൈറ്റ് ഇമേജ് സെന്‍സറും ഉള്‍പ്പെടുന്നു. ഏറ്റവും പുതിയ ലൈക ക്യു2 മോണോക്രോം ക്യാമറയുടെ ബ്ലാക്ക് ആൻഡ് വൈറ്റ് പ്രവർത്തനം ലൈക എം10 മോണോക്രോമിന് സമാനമാണ്. ക്യു2 മോണോക്രോം ക്യാമറ വിപണിയില്‍ ശ്രദ്ധേയമാകുവാന്‍ കാരണം ബ്ലാക്ക് ആന്‍ഡ് വൈറ്റ് ഫോട്ടോകള്‍ മാത്രം ക്ലിക്ക് ചെയ്യാൻ സാധിക്കുന്ന ക്യാമറ എന്നതിനാലാണ്.
ലൈക ക്യു2 മോണോക്രോം: സവിശേഷതകള്‍
47.3 മെഗാപിക്സൽ സിഎംഒഎസ് മോണോക്രോം സെൻസർ, 3 ഇഞ്ച് ടിഎഫ്ടി ടച്ച് ഡിസ്പ്ലേ, ഒഎൽഇഡി വ്യൂഫൈൻഡർ, 75 മില്ലീമീറ്റർ വരെ ഡിജിറ്റൽ സൂം ഫംഗ്ഷൻ തുടങ്ങിയ സവിശേഷതകളോട് കൂടിയതാണ് ലൈക ക്യു2 മോണോക്രോം. ഒരു ലക്ഷം വരെ ഐ‌എസ്ഒ സെൻസിറ്റിവിറ്റികൾ ക്യാമറ വാഗ്ദാനം ചെയ്യുന്നു.
ക്യു2 മോണോക്രോം ക്യാമറയുടെ ഫിക്സഡ് പ്രൈം ലെൻസ് 9 ഗ്രൂപ്പുകളിലായി 11 ഘടകങ്ങൾ ഉപയോഗിച്ച് 3 അസ്ഫെറിക്കൽ ഘടകങ്ങളുള്ള 28mm എഫ്1.7 ലെൻസാണ്. കമ്പനി അവകാശപ്പെടുന്നതുപോലെ, “എഫ്/ 1.7 ന്‍റെ അപ്പേർച്ചർ ഏറ്റവും ബുദ്ധിമുട്ടുള്ള ലൈറ്റിംഗ് സാഹചര്യങ്ങളിൽ പോലും ചിത്രത്തിന്‍റെ ഗുണനിലവാരം ഉറപ്പുനൽകുന്നു.”
ലൈക ഫോട്ടോസ് ആപ്പ് ഉപയോഗിച്ച്, ക്യാമറയുടെ സംയോജിത വൈഫൈ മൊഡ്യൂൾ ഉപയോക്താക്കൾക്ക് സോഷ്യൽ മീഡിയ വഴി ചിത്രങ്ങൾ പങ്കിടാനോ സ്മാർട്ട്‌ഫോണിൽ നിന്ന് ക്യാമറ സെറ്റിംഗ്സ് മാറ്റാനോ ലൈക ക്യു2 മോണോക്രോമിന്‍റെ ഷട്ടർ റിലീസ് റിമോട്ടായി നിയന്ത്രിക്കാനോ സാധ്യമാക്കുന്നു. ഒരു സ്മാർട്ട്‌ഫോൺ ഉപയോഗിച്ച് ക്യാമറ തൽക്ഷണം ജോടിയാക്കുന്നതിന് ബ്ലൂടൂത്ത് LE (ലോ എനർജി) സവിശേഷതയും ക്യാമറയില്‍ ഉള്‍പ്പെടുന്നു.
ലൈക ക്യു 2 മോണോക്രോം: വിലയും ലഭ്യതയും
ഇന്ത്യയിൽ ലൈക ക്യു2 മോണോക്രോം ക്യാമറ മോഡൽ 411017 രൂപയ്ക്ക് ലഭ്യമാണ്. ബ്ലാക്ക് ആൻഡ് വൈറ്റ് പതിപ്പിലുള്ള ക്യു2 ക്യാമറ നവംബർ 20 മുതൽ ആരംഭിക്കും. ഉപയോക്താക്കൾക്ക് കമ്പനിയുടെ ഓൺലൈൻ സ്റ്റോറിൽ നിന്നും റീട്ടെയിൽ സ്റ്റോറിൽ നിന്നും ലൈക ക്യു2 മോണോക്രോം വാങ്ങാം.
About The Author
Leave a Reply