നടക്കാനും നിൽക്കാനും ബുദ്ധിമുട്ടുന്നവർക്കും ശാരീരികമായ പിന്തുണ ആവശ്യമുള്ളവർക്കും വിപ്ലവകരമായ മാറ്റം വാഗ്ദാനം ചെയ്ത് അത്യാധുനിക ‘സ്മാർട്ട് വസ്ത്രങ്ങൾ’ വിപണിയിലേക്ക് എത്തുന്നു. കാനഡ ഗവൺമെന്റിന്റെ 24 മില്യൺ ഡോളർ ധനസഹായത്തോടെ നടക്കുന്ന അന്താരാഷ്ട്ര ഗവേഷണ പദ്ധതിയിലൂടെയാണ് സാധാരണ തുണിത്തരങ്ങൾ പോലെ ധരിക്കാവുന്ന ഈ സാങ്കേതികവിദ്യ യാഥാർത്ഥ്യമാകുന്നത്. നിലവിൽ ലഭ്യമായ ഭാരമേറിയതും ഉപയോഗിക്കാൻ പ്രയാസമുള്ളതുമായ റോബോട്ടിക് ഉപകരണങ്ങൾക്ക് പകരമായി, അലക്കി വൃത്തിയാക്കാവുന്നതും ഏത് ശരീരപ്രകൃതിക്കും അനുയോജ്യമായതുമായ വസ്ത്രങ്ങളാണ് ഇതിലൂടെ നിർമ്മിക്കുന്നത്.
ഈ വസ്ത്രങ്ങളുടെ പ്രധാന സവിശേഷത അവയുടെ നാരുകളിൽ തന്നെ ഒളിപ്പിച്ചുവെച്ചിരിക്കുന്ന ‘ഇലക്ട്രോസ്റ്റാറ്റിക് അക്ചുവേറ്ററുകൾ’ (Electrostatic Actuators) ആണ്. വസ്ത്രത്തിന്റെ നൂലുകളിൽ ഘടിപ്പിച്ചിരിക്കുന്ന ഈ സൂക്ഷ്മ സംവിധാനങ്ങൾ വളരെ കുറഞ്ഞ വോൾട്ടേജ് ഉപയോഗിച്ച് പ്രവർത്തിക്കുകയും ആവശ്യാനുസരണം വസ്ത്രത്തിന്റെ കാഠിന്യം കൂട്ടുകയോ കുറയ്ക്കുകയോ ചെയ്യുന്നു.
ഇതിലൂടെ കസേരയിൽ നിന്ന് എഴുന്നേൽക്കുമ്പോഴോ നടക്കുമ്പോഴോ പേശികൾക്ക് ലഭിക്കേണ്ട അധികബലം കൃത്യമായി നൽകാൻ ഈ വസ്ത്രങ്ങൾക്ക് സാധിക്കും. വസ്ത്രത്തിനുള്ളിൽ തന്നെ ഘടിപ്പിച്ചിട്ടുള്ള സെൻസറുകൾ മനുഷ്യന്റെ ചലനങ്ങളെ മുൻകൂട്ടി മനസ്സിലാക്കുകയും അതനുസരിച്ച് വസ്ത്രത്തിന്റെ ഘടനയിൽ മാറ്റം വരുത്തുകയും ചെയ്യുന്നു.
വിവരങ്ങൾ വിശകലനം ചെയ്യാനുള്ള കമ്പ്യൂട്ടർ സംവിധാനങ്ങൾ വസ്ത്രത്തിൽ തന്നെ ഉൾപ്പെടുത്തിയിട്ടുള്ളതിനാൽ വിവരങ്ങൾ ചോരാതിരിക്കാനുള്ള സ്വകാര്യതയും ഇതിൽ ഉറപ്പാക്കുന്നുണ്ട്. പ്രായമായവർക്കും രോഗികളെ പരിചരിക്കുന്നവർക്കും കൈകാലുകളുടെ ചലനത്തിന് പിന്തുണ വേണ്ടവർക്കും ഒരുപോലെ പ്രയോജനപ്പെടുന്ന രീതിയിലാണ് ഇതിന്റെ രൂപകൽപ്പന. 2025-ൽ പ്രവർത്തനമാരംഭിച്ച ഈ പദ്ധതിയുടെ ഭാഗമായി നിലവിൽ സ്മാർട്ട് സ്ലീവുകൾ, ലെഗ്ഗിങ്സുകൾ എന്നിവയുടെ പരീക്ഷണാടിസ്ഥാനത്തിലുള്ള നിർമ്മാണം നടന്നുവരികയാണ്. വസ്ത്രം വെറും വേഷമല്ല, മറിച്ച് ശരീരത്തിന് കരുത്ത് പകരുന്ന ഒരു യന്ത്രമായി മാറുന്ന കാലം ഇനി അധികം അകലെയല്ല.
About The Author
