സിനിമകളും ടിവി ഷോകളും ഇഷ്ടപ്പെടുന്നവർക്ക് സന്തോഷവാർത്ത. തങ്ങൾക്കിഷ്ടപ്പെട്ട വിനോദപരിപാടികൾ ഏത് ആപ്പിലാണ് സ്ട്രീം ചെയ്യുന്നതെന്ന് കണ്ടെത്താൻ സഹായിക്കുന്ന പുതിയ ഫീച്ചർ അവതരിപ്പിക്കാനൊരുങ്ങി ഗൂഗിൾ പ്ലേ സ്റ്റോർ. സെർച്ച് റിസൾട്ടുകളിൽ ‘വെയർ ടു വാച്ച്’ (Where to watch) എന്ന കാർഡ് ഉൾപ്പെടുത്തിയാണ് ഗൂഗിൾ ഈ മാറ്റം കൊണ്ടുവരുന്നത്.
പ്ലേ സ്റ്റോറിലെ സെർച്ച് ടാബിൽ പോയി നിങ്ങൾക്ക് വേണ്ട സിനിമയുടെയോ ഷോയുടെയോ പേര് നൽകുക. ഉടൻ തന്നെ ആ ടൈറ്റിൽ ലഭ്യമായ സ്ട്രീമിംഗ് ആപ്പുകളുടെ ലിസ്റ്റ് ‘വെയർ ടു വാച്ച്’ കാർഡിൽ തെളിയും. സ്ട്രീമിംഗ് പ്ലാറ്റ്ഫോമുകൾക്ക് പുറമെ, സിനിമകൾ വാടകയ്ക്കെടുക്കാനോ (Rent) വാങ്ങാനോ (Buy) കഴിയുന്ന സേവനങ്ങളും ഇതിൽ കാണിക്കും. നിങ്ങളുടെ ഫോണിൽ ഇല്ലാത്ത ആപ്പിലാണ് സിനിമ ഉള്ളതെങ്കിൽ, അവിടെ നിന്ന് തന്നെ നേരിട്ട് ആ ആപ്പ് ഇൻസ്റ്റാൾ ചെയ്യാനുള്ള ഓപ്ഷനും ഗൂഗിൾ നൽകുന്നുണ്ട്. ഗൂഗിൾ പങ്കുവെച്ച വിവരങ്ങൾ പ്രകാരം, “The Last of Us” എന്ന് സെർച്ച് ചെയ്യുമ്പോൾ എച്ച്ബിഒ മാക്സ് (HBO Max), ആമസോൺ പ്രൈം വീഡിയോ തുടങ്ങിയ ആപ്പുകളുടെ വിവരങ്ങൾ കാണിക്കാൻ ഈ ഫീച്ചറിന് സാധിക്കും.
ഈ ഫീച്ചർ ഏറെ ഉപയോഗപ്രദമാണെങ്കിലും ചില പോരായ്മകളുമുണ്ട്. സിനിമ കാണാൻ ആവശ്യമായ സബ്സ്ക്രിപ്ഷൻ തുകയോ റെന്റൽ ചാർജുകളോ ഈ കാർഡിൽ പ്രദർശിപ്പിക്കില്ല. കൂടാതെ, സിനിമയുടെ ഐഎംഡിബി (IMDb) റേറ്റിംഗുകളോ യൂട്യൂബ് ട്രെയിലർ ലിങ്കുകളോ ഇതിൽ ഉൾപ്പെടുത്തിയിട്ടില്ല.
ഗൂഗിൾ സെർച്ചിൽ (Google Search) നേരത്തെ തന്നെ സിനിമകൾ എവിടെ ലഭ്യമാണെന്ന് കാണാനുള്ള സൗകര്യമുണ്ട്. എന്നാൽ പ്ലേ സ്റ്റോറിലേക്ക് വരുമ്പോൾ, ഉപഭോക്താക്കൾക്ക് പുതിയ ആപ്പുകൾ പരിചയപ്പെടുത്തുക (App Discovery) എന്നതാണ് ഗൂഗിളിന്റെ പ്രധാന ലക്ഷ്യമെന്ന് കരുതപ്പെടുന്നു. ജസ്റ്റ് വാച്ച് (JustWatch) പോലുള്ള സേവനങ്ങൾക്ക് ഇതൊരു ലളിതമായ ബദലായിരിക്കും.
ഈ ഫീച്ചർ ഇപ്പോൾ ഘട്ടംഘട്ടമായി എല്ലാ ആൻഡ്രോയിഡ് ഫോണുകളിലേക്കും എത്തിക്കൊണ്ടിരിക്കുകയാണ്. ഏറ്റവും പുതിയ ഡിവൈസുകളിൽ പോലും ഇത് വൈകാതെ ലഭ്യമാകുമെന്ന് പ്രതീക്ഷിക്കുന്നു.
About The Author
